半世纪前海军秘密香港行山路线　保育先锋香乐思带你寻幽探秘

今日想同大家介绍嘅系《野外香港岁时记》原作者香乐思推荐嘅隐秘行山路径。呢本书其实我系喺一次机缘巧合之下喺中华书局度见到嘅，始终关于行山呀郊外呀嘅书唔系好多，所以当时我见到呢本书嘅时候即刻好似如获至宝咁，眼睛发亮，好期待本书讲咩。
撰文：山系人

【文章原刊于01撑场，欢迎下载香港01 app，与星级作者一同讨论喜爱话题。】

下载“香港01”App ，即睇城中热话：https://hk01.app.link/qIZYuEC5LO

第四章讲到香氏凭借佢系海军将领嘅女婿，获得一份海军之间流传嘅行山路线图，而路线图所记载嘅行山路径有我哋熟悉嘅大帽山凤凰山，亦有我哋唔熟悉嘅行山路径，就系由九龙湾和东涌出发，行未有发展成行山路径嘅偏僻山野。班海军热血得很，唔中意做啲平凡事，即使行大帽山同凤凰山，佢哋都会选择行一啲较为隐秘刺激嘅路径抵达终点。正因为佢哋热爱刺激隐秘，专拣未开发嘅行山路径，所以香氏所推荐嘅行山路径多数都需要行差不多十个钟头，真系对山野少啲热诚，个人少啲体力都唔得呀！

首先就讲下最不为人知嘅九龙湾路径先啦！

路径如下：由九龙湾出发，穿过茶寮坳落山，沿白沙湾西海岸走到去当时仲系风光如画嘅西贡墟。然后穿越水稻田入树林，去到虎地头村。之后走到去坑槽水河谷，去到十字路口，然后行右边嘅山脊方向上山。呢条路山势陡峭，一个唔小心就非死即伤，非常危险。行完条陡峭嘅路，就上马鞍山东峰，然后一路行上马鞍山主峰。

行去主峰嘅途中会经过大亚湾，相传大亚湾以前叫Bias Bay，即系偏邪之地，只因Bias Bay以前系海盗集中地，佢哋经常掠夺商船。后来海盗因为掠夺Irene号商船，遭到皇家海军拘捕，判以死刑，自此Bias Bay嘅海盗就灭咗迹啦！

经过Bias Bay上到主峰之后，往东落500尺，行过高高低低嘅吊手岩，再沿山脊往西落大水坑村前溪口，行三里半到沙田围，再行两里到沙田坳，然后就会到添马舰。全程9小时15分钟。

哇！就咁睇睇我识嘅地名，九龙湾即系九龙区啦，西贡墟即系新界最东面啦，然后去返马鞍山沙田，即系上返新界东上少少，到咗沙田之后居然会去到金钟政府总部𠮶边，认真amazing！点解喺新东行行下会过咗个维港，去咗港岛嘅呢？相信香乐思喺当中冇记载到佢当时应该搭咗啲小舢板过海，先会去到金钟。

总括嚟讲九龙湾呢条隐秘行山径系几有挑战性同神秘感嘅，不过我相信最后去到金钟个度依家做唔到啦！我就会喺呢紧放假，约班朋友行九龙湾呢条隐世行山路线，不过就会去到沙田就算。始终依家我哋应该冇咩可能可以唔经陆路交通直接到达金钟。大家有兴趣嘅，都可以约埋一班山系人挑战下呢条隐世路线！

书入面其实仲提到好多其他行山路径，包括：由长洲出发去凤凰山；由沙田出发去到慈云山以北嘅山顶；由荃湾出发去大帽山山顶等等。不过由于我担心有版权问题，唔可以再继续详述其余行山路径，大家有兴趣想知道其他行山秘境，可以去书局买《野外香港岁时记》。

大家唔好抱住睇小说嘅心态去睇呢本书，要抱住好似睇紧人哋本日记或者一本教科书嘅心态去睇。因为呢本书尽是平铺直述嘅文字，绝对冇小说咁峰回路转高低跌宕。不过，即使未如小说般有转折点咁刺激，单单系睇香氏述及不为人知嘅行山秘境，靠想象都已经感受到香氏𠮶种喜爱山间嘅感觉，未经发掘嘅山间秘境给人清新、神秘、危险之感。所以，呢本书系绝对有睇嘅价值！各位山系人，我绝对推荐你哋去睇呢本书！

讲完本书，我觉得有需要讲下原作者同译注者。畀大家认识一下佢哋两位，全靠两位我哋先可以有机会知道呢几条喺海军之间流传嘅秘密行山路线。

先讲下原作者，佢叫香乐思。上网翻查过关于佢嘅背景，原来系一个保育先锋，倡议将一啲有生态价值嘅山野列为郊野公园保育，设立宿舍予动植物研究专家长居，以方便研究山野之间嘅稀有品种。香乐思爱大自然嘅程度可谓系去到疯狂嘅程度，我呢个Yama Girl山系女孩都望尘莫及呀！

话说原来香乐思经历过日军统治嘅三年零八个月，而香乐思当时就被囚禁于赤柱集中营。而赤柱集中营嘅自然环境深深吸引住山野男子香乐思。即使佢被日军囚禁住，仍然不忘研究赤柱自然环境动植物品种，以青竹蛇为宠物，睇螳螂卵泡成长为乐。

正正因为香乐思系一个咁热爱山野嘅男子，令我对佢本书更加有兴趣。

而有呢本咁珍贵嘅书出现，亦要感谢译注者彭玉文，倘若冇彭先生嘅翻译同备注，恐怕香乐思嘅海军秘密行山径就要失传。点解？因为香乐思写呢本书嘅时候香港仲系好落后，未有太多发展，香乐思所记载嘅地名分分钟都会同我哋依家嘅地名唔同；有啲行山路径甚至乎已经消失于世上，所以全靠彭先生实地考察同揾好多参考书籍，先能够令我今日可以一睹香乐思所推介嘅行山秘境，同大家分享。

【编按：文章题目为编辑所拟，原题为“读：《野外香港岁时记》──发掘属于海军的秘密行山路径”】

（文章纯属作者意见，不代表香港01立场。）