酷热天气下独自行城门水塘 山友带唔够水险因热衰竭死在针山
今年炎夏来得特别早，这几天气温持续屡创新高，多渴水、小心中暑及热衰竭成为不少人的口头禅。一名一向有行山习惯的市民，近日独自上针山，由于熟悉该条路径，所以轻视了酷热天气的危险因素，带不够水上山，差点因为热衰竭而死在山上。他呼吁其他行山友不论有多熟路，都要留意天气及身体状况，同时要准备较多的水，不要等口渴才饮，否则已太迟。
该名巿民匿名投稿到Fitz运动平台，《香港01》获授权转载全文内容：
利申：以下是真实故事，所经历一切系个别状况，并非医学解释。文章目的是提醒大家，参与户外活动必须要小心酷热天气。有关中暑及热衰竭预防与治疗，请参考专业医疗文章，或征询医务人员意见。
难得有一日喺闲日放假，人人返咗工，郊外一定水尽鹅飞，梗系上山享受难得嘅宁静。
呢一日天色极好，万里无云，天空蓝得有啲假。我搭上了82号绿色小巴，直奔城门水塘。
计划系由城门水塘主坝，沿水塘裙边而行2公里左右，上草山林道，然后逆走麦径七段上针山，返回主坝。因为路径熟悉，过往都在2个钟内完成，所以只带800ml食水，几粒盐糖，一条能量棒。
起步时气温约29度，初段水塘山径，两旁有树荫，时有微风，其实都几舒服，仲可以跑几步。亦知道山上太阳猛烈，呢一段专登少饮水，谂住留番啲水上山饮。
唔使一个钟，边行边跑去到针山山脚，望住针山畀太阳晒住，自己已经成身湿晒，不过 feel 到状态都唔错，只系觉得有啲口干。
当时谂，一定系坐小巴前食𠮶碗太兴餐蛋面啲味精太劲! 水唔饮住，食粒盐糖先。
知道天气热，已减慢速度一步步爬上针山，汗水无停过系咁流，面上嘅汗，用毛巾抹极都有。喺中途停咗两三次之后，终于上到针山山顶。
原本想喺山顶稍作休息，不过太阳实在太猛，地面散发嘅热气亦令人相当难受，唯有饮啖水，慢慢落山。
水樽嘅800毫升食水，而家得番一半。
水饮得好快，但都唔够身上嘅体力消耗得快。而且虽然行得慢，不过心跳竟然 keep 住160左近，我开行 turbo 用5分披跑400米都未必会跳得咁快。
体力好似突然被搾干，越行越慢，越来越想停。呢个时候心里盘算，如果停得太多，即系话要消耗更多食水，到时未必够水落山。
喺咁嘅情况之下，唯有放松身体，一步一步落呢1900级楼级，再慢慢饮埋𠮶唔够400毫升嘅食水。
结果，前后用咗差唔多3个钟行番去主坝，将剩番𠮶一啖食水一饮而下! 再慢慢行去烧烤场公厕，开猛水喉冻水照头淋，然后队番支宝矿力，先叫做有力行番去小巴站返归!
返到屋企仲大镬!
返到屋企，冲完凉食完饭，以为休息一下就可以复原。点知虽然开行冷气，但仍然不断出汗，而且觉得心跳得有啲异常，坐低再企起身时亦有头晕。我随即拎老豆个血压计量一量:
上压 107，下压65－因为家父患有高血压，我平时有帮佢量血压。所以我知道，我而家嘅血压好低 (我平时下压有80)。而持续嘅低血压，系可引发缺血性中风！
而令我更担心嘅，就系血压计亦显示我有心律不正。脉膊有时过100，有时得番70。
好彩我当年喺 St. John 读过急救证书，呢两年虽然无续牌。不过亦记得低血压、心律不正，以及全身无力，系热衰竭嘅征状。而治疗热衰竭，最重要系令身体降温，以及补充水份及电解质。
咁样，我就冲多次凉，开支宝矿力加冰。然后开多把风扇，瞓番一觉。
浅睡咗个零钟之后，出汗少咗，头晕嘅情况亦减轻，血压亦开始回升。
由下昼2点返到屋企，到晚上9点几，唔舒服嘅感觉终于消失。
我写呢段经历出嚟，只希望提醒大家，行山最紧要做好准备，唔好持熟卖熟。呢段路我差唔多一个月行一次，结果都会中伏。喺呢度再次提醒大家:
千祈唔好一个人行山。无论条路几易，你有几熟路都好，突发情况你未必可以预计到。留意天气情况。原来喺我上山之后，天文台发出咗酷热天气警告。我如果有留意，就唔会带咁少水，亦唔会上针山。注意食水同食物。真系唔好懒，预多少少水，以备不时之需。能量饮品系必需品，单靠盐糖等“口立湿”系唔够。要定时饮水、食嘢。当觉得口渴先饮水，已经太迟。留意身体状况。好似当我去到针山山脚，其实已经 feel 到出汗比平时多，𠮶时应该检讨一下自己情况，唔应该踏上针山嘅石级，应该行回头路慢慢走。
我知道教训嘞，下次唔敢了!
（文章标题由《香港01》编辑所拟。文章纯属作者意见，不代表《香港01》立场。）