首尔、釜山、京畿道5大特色壁画村　韩国自由行打卡必去！

自从韩剧时不时都会以壁画村作为拍摄场景之后，壁画村就成为咗韩国旅游嘅热点项目，唔少人都特登走去影下相，做下文青。究竟韩国壁画村有几多呢？等我帮你盘点几个韩国比较出名特别嘅壁画地段啦！

一、梨花洞壁画村 (Ihwa Maeul) ——首尔

由于梨花洞系韩国剧组经常取景嘅地方，加上有韩国当地综艺节目介绍，令到梨花壁画村成为全韩国最出名嘅壁画村。自2006年开始，首尔政府推动“骆山艺术 2006”，同逾60位艺术家进行旧区美化。最近，梨花壁画村部分阶梯（两条分别画有花同鱼嘅楼梯）暂时封闭，想去嘅朋友可以留意返。

二、行宫洞壁画村 (Haenggung-dong Mural Village) —— 水原

行宫洞壁画村位于水原市北水洞一带，属于规模较细嘅壁画村。北水洞一带属于市内嘅旧区，位处华虹门附近，大部分都系八十到九十年代所建造嘅住屋。除咗壁画之外，附近仲有两间画廊，包括Alternative Art Space Noon同埋Space Bom，对艺术有兴趣嘅朋友不妨一去。

三、滋满壁画村 (Jaman Mural Village) ——全州

滋满壁画村同其他壁画村一样，有唔少艺术家同画家进驻，比较特别嘅地方在于滋满壁画村有比较多嘅卡通人物壁画。成个壁画村依山而建，大部分嘅屋都位于山腰，感觉上同台北嘅宝藏岩差唔多，行到顶就可以睇到全韩国最大嘅韩屋村（全州韩屋村）。

四、甘川文化村（Gamcheon Culture Village）——釜山

甘川文化村位于山脚位置，系韩国规模比较大同多元化嘅艺术村，大家可以沿住梯级同巷弄慢慢探索充满艺术嘅社区。入到文化村门口，可以喺附近嘅旅游咨询所买一张地图，除咗可以方便参观，仲可以玩游戏添！反转张地图，就会发现系个储印仔嘅游戏，一路参观一路吸印仔，储齐仲可以换post card。睇壁画之余，记得参加村内嘅各种工作坊，带走属于大家嘅回忆！

五、松月洞童话村（Songwol-dong Fairy Tale Village）—— 仁川

松月洞自从仁川喺1883年对外开放港口嘅时候就已经存在，早期主要系外国人嘅聚居地，后期因为年轻人外流导致松月洞开始没落。韩国政府为咗改善区域环境，就开始用童话故事去重新设计松月洞，形成今日嘅童话村。叫得童话村就梗唔少得公主同王子，当然仲有唔少大家由细睇到大嘅卡通人物，去嘅时候即管睇下自己认得几多个！

【本文获“KKday”授权转载。】