ZANCO tiny T1开箱比你想像中更细 超微型手机行山最啱
ZANCO tiny T1 这款手机主打微型！话自己话可能系世界上最最细嘅电话，听落都觉得好想试下。想当年用过叫做全世界最薄嘅电话系 Sony Ericsson，但当今日各大智能手机都追求大得来又好揸手嘅时候，估唔到会有厂商推出极细手机。
到底有几细呢？谂一谂放得落张 nanoSIM Card 又唔可能太细只啦！因为都要放其他线路版，仲要放得落喇叭、键盘等，细极点都有个谱。
点知……开箱一睇真系细到有啲过份…
ZANCO tiny T1 手机个盒平平无奇，当你以为个盒好细，已经系部机嘅实际尺吋时，打开发觉部手机仲细，真系好细，连个盒嘅二分一都无，大概系盒嘅六分一，好夸张。
最过份系你竟然仲见到部手机有个屏幕，而屏幕下面仲有五粒掣，再下面仲有 12 粒传统数字拨号键盘设计，真系手指大啲都用唔到。
好难形容到部手机有几细，所以直接拿个 micrUSB 转 lightning 插头来比较，只系大个插头少少，机身只有 46.7mm x 21m x 12mm。
规格上佢系用 MTK6261D，行 2G GSM850、GSM900、DCS1800 及 PCS1900，有 32MB RAM + 32MB ROM，得一个 0.49 吋嘅 64 x 32 解像度 OLED 屏幕及 200mAh 电池。
一部咁细嘅机有咩用呢？佢可以挂在钥匙包而毫不突兀，或者行山出外、跑步时挂于裤头或者袋内都唔会阻住。当然，你唔好以为呢部电话可以帮你上 FB、影相或者做啲咩超劲行为。
佢最大嘅卖点就系细细部有 3 日待机，180 分钟通话时间。就算行错路想打电话问朋友都唔驶惊电话无电，绝对系一个远行者必备嘅电话。依家咁多人钟意揹住个背包去旅行，整返部保平安就啱啦！
HTC入门级手机Desire 12+即日上市，旗舰机U12+上市有期！
【本文获“Mobile Magazine”授权转载。】