VPET职出真我｜职专课程改变人生轨道　边做边学迈向升降机工程师

不少人以为升降机工程师系体力化嘅工作，但随住技术进步已经有所改变，慢慢变成技术化工种。Michelle依家系升降机工程高级文凭课程学生及学徒，一边读书一边做野，透过职专教育课程逐步向成为注册升降机工程师嘅梦想进发。

职专课程改变人生 满足就业与进修需要

升降机学徒Michelle认为香港地少人多，有唔少高楼大厦，加上配合新发展区嘅发展，对升降机维修及建造嘅需求与日俱增，行业求才若渴，系一个稳定嘅行业。2020年，佢读完飞机维修职专文凭后，受到疫情影响，飞机维修公司决定暂时停止举办学徒培训，所以佢就喺学徒事务署推介下，报咗依个兼读制嘅机械工程学高级文凭，一边做野一边读书。“依个课程好好，课程内容同我嘅工作息息相关，包括电子绘图嘅技巧，方便我之后利用电脑绘画机械工程嘅设计图。课程中我亦学习到一啲流体力学嘅原理同理论知识等。”佢又提到，工作方面亦有好多得著，例如学到待人接物嘅应有态度。“我可以赚取工作经验同薪金，又有专业训练，满足就业同进修需要，行业前景亦明朗，机械工程学高级文凭系一个好好嘅课程。”

打破固有刻板印象　持续进修目标明确

讲到需要面对嘅最大挑战，Michelle话系嚟自屋企人对于自己入行嘅忧虑。升降机行业男多女少，屋企人担心依份工嘅体力劳动量好大，女仔未必可以应付。“其实随住科技进步，升降机有好多部件亦逐渐轻量化，比起一般搬运工作，更加著重于系统测试。我虽然系个女仔，亦可以轻易应付依份工作，放咗工亦都唔会好攰。”

Michelle以成为升降机工程师为目标，打算完成依四年学徒训练后，继续进修，完成学士学位，再向公司申请报考升降机工程师资格。佢提到，透过职专教育嘅课程，喺升降机行业完成四年嘅学徒训练后，可以申请成为注册技工，亦可以同时获得机械工程学高级文凭学位。如果想成为注册成为升降机工程师，就需要相关资历，例如机械工程学学士学位以及相关工作经验。“一味靠热血系唔够㗎，最紧要系保持冷静思考方式、确保升降机安全运作先俾人搭，咁样就系最好嘅服务态度。”电梯工程系香港重要行业之一，一般升降机技工月薪约$15,000至$25,000、升降机技术员则可达$35,000，而升降机工程师月薪约$25,000至$60,000、工程经理月薪更有机会达$60,000或以上。

职专教育专页仲以“职出真我”为主题，鼓励学生将兴趣发展成专业，寻找属于自己嘅天地。想了解更多职专教育详情，就唔好犹豫即刻登入职专教育网页，同埋Facebook、Instagram专页。网页详细列出唔同职专教育嘅课程、行业、相关资历阶梯，一睇即知行业嘅发展前景，有需要仲可以用埋网页嘅课程搜寻功能，只要输入有兴趣嘅行业或者院校名，一Click即睇晒相关课程嘅报读资讯。

为咗令大家更加了解职专教育下学生点样打好基础再投身职场尽展所长，《香港01》先后请嚟5位分别喺职专教育协助下成功入行嘅从业员分享，除咗升降机技术员学徒Michelle，仲包括游戏公司总监、网络顾问、攀树员，以及放射师等等，分享佢哋学以致用嘅故事，等大家更了解各行各业发展，以及职专教育的关键作用，万勿错过。