【博评．比利时连环爆炸】恐袭经济学：靠睇大市揾恐怖分子？

恐布分子想先沽空后恐袭，“又食又拎”揾钱，愈嚟愈难。巴黎𠮶次，如果平仓唔够快，仲要倒输。世界十分难捞。You are not alone。

先声明：本文写于比利时恐袭之后，无意抽水，或强化“左胶”式的论述（如“最衰都系美国”、“怨怨相报何时了”之类），但亦无打算讉责圣战分子新移民之类。反正以上两种文章你都睇咗不少。

本文讲嘅，系“恐袭经济学”。恐袭都有经济学？系我发明的词语。系估计恐袭损失几多，定系搞一次恐袭要几钱？冇咁闷。睇落去你就知。

美国政府靠买保险　辨认恐怖分子？

Steven Levitt 同 Stephen Dubner 在《Freakonomics》（台译《苹果橘子经济学》，倒不如大陆译名《怪诞经济学》）书中提过，美国政府揾过佢哋研究，希望有方法一早可以辨认到恐怖分子。当然唔系穆斯林或中东人就系恐怖分子，咁揾法，揾到天光都未掂。

最可疑系乜人？就系年青、收入不错、结咗婚有仔女，但冇买人寿保险嘅男性。

正常咁嘅人点都会买保险，但恐怖分子好可能唔会多此一举——反正炸死冇得赔。所以，作者“建议”，如果你系自杀炸弹客，最好都系去买人寿保险——有事都系冇得赔，但至少冇咁易俾人一早捉到。

另一方面，恐袭有人赚钱倒唔系新鲜事。除咗军火商外，仲有一种，就系沽空金融市场嘅人。占士邦片《皇家赌场》（Casino Royale），大奸角 Le Chiffre 就系先沽空航空公司，然后再炸飞机。出事后航空公司股价大跌，奸角赚大钱。就系咁简单。

但现实中“沽空航空公司炸飞机”的方法，唔系太 work。点解？就系因为政府一早睇住，大手沽空航空公司好易俾人发现。当年马航客机失踪，之前股价已经大跌，仲系大成交，当局一样有查沽空纪录。后来冇结论，或有结论唔公开，就后话。

恐袭前，先沽空大市？

恐怖分子都会睇书（阅读好重要喔），一样知易俾人拉。所以后来闻说（又系《Freakonomics》𠮶几位怪鸡讲的），佢哋唔再沽空航空公司，改为沽空成个大市。听落好似几好：首先，唔使一定炸／劫架飞机先；二来，一般指数期货（美国就系道琼斯或标普指数）成交太多，好难俾人查到。怪鸡作者透露，中情局（CIA）甚至试过想揾凭标普指数期货沽空纪录，一早锁定目标，后来发现实在冇可能，作罢。

不得不赞荷李活都与时并进。早排劣评如潮、Milla Jovovich 的《恐袭生还者》（Survivor）亦系呢条沽空大市的桥。甚至早几年 Chris Pine 套《魅影特攻》（Jack Ryan: Shadow Recruit）中，俄佬奸角亦系沽空美金。包你冇得事先查。

但，以上的揾钱方法，而家就唔系好掂。点解？回到起初，你想像下，大吉利市炸咗只国泰客机，国泰股价点都大跌，对不？马航只飞机唔见咗，股价一样大跌。只要炸得到，赚钱，“其实唔难”。

但，去恐袭某国，当系首都咁话，系咪就令到股市必跌？好似系，又好似唔系。好彩，或者应该话唔好彩，我哋有历史数据。

恐袭唔一定冧市

911 之后，美股复市重挫 7%，事先沽空咗的必然赚大钱。2004 年 311 西班牙马德里 4 架火车俾人炸咗，欧洲股市不过系跌 2 至 3%。2005 年伦敦 77 爆炸案，欧洲股市跌幅亦大约系 3%。到旧年巴黎恐袭，欧洲股市甚至即日已经倒升。今次比利时布鲁塞尔，情况亦差不多。

当然 911 系一个例外，死伤人数多好多，规模大好多，亦系 N 年来美国（或“先进国家”）本土第一次受袭。但其后𠮶几次欧洲恐袭，死伤人数同股市跌幅见唔到有好大关系。换句话讲，恐布分子想先沽空后恐袭，“又食又拎”揾钱，愈嚟愈难。巴黎𠮶次，如果平仓唔够快，仲要倒输。世界十分难捞。You are not alone。

金融市场已开始对恐袭麻木

点解会咁？关键其实唔系死伤人数，而系时序。

我特地将 5 次恐袭顺时序地讲。可以见到，普遍来讲，愈近期嘅恐袭，对金融市场影响愈细，市场亦都消化得愈快。

原因？因为大家已经麻木。或习惯左。今日我都仲见到有人在专栏讲 Alphago。正如事隔一星期，仲有人讲紧方力申同 Stephy。但我好肯定，一个星期后，已经冇乜人会再讲比利时。

留意：呢种麻木不见得同地方有关。不错，巴黎系花都，We'll Always Have Paris。夹硬拎去同肯雅、甚至早排土耳其安卡拉讲（莫讲话去过，大把人连安卡拉喺边都未知），问点解冇 Pray for Kenya，实在相当左胶。

比利时系“欧洲首都”　一样唔太多人关心

但，比利时㖞。Godiva 㖞。《丁丁历险记》（Tin Tin）㖞。窝夫㖞。Stella 啤酒㖞。我已经冇乜朋友，但都有两个香港朋友事发当日在比利时。况且比利时系“欧洲首都”， 现代欧盟可以话系起源自 1950 年代荷兰比利时卢森堡的关税联盟。后来加埋西德法国意大利，组成欧洲煤钢共同体，就系欧盟的前身。

比利时唔系肯雅，唔系土耳其，但一样唔太多人关心。换头像一样有，但金融市场最客观。金钱最贪婪亦都最细胆，势色唔对必定走路，唔会留多半秒。明显地，恐袭重挫金融市场呢支歌仔，已经好难再唱。

恐袭将更频繁　只能 live with it

点解？好简单，因为见惯。巴黎恐袭后，已经有不少评论讲，恐袭会成为新常态。在餐厅食饭，或睇紧歌剧，忽然有人走入嚟开枪乱扫。点防？今次比利时恐袭，唔算系巴黎式的“独狼”袭击，但亦不见得好似 911 或马德里咁组织严密。

政治不正确的讲句，恐袭已经“遍地开花”，冇得点防。

唔好忘记凡事有成本。要“一次都太多”，彻底防止巴黎式恐袭，应该个个去餐厅食饭都要搜身，入歌剧院唔畀带手袋唔畀著大褛。唔实际，亦扰民。政府只好将资源集在中防止较大型嘅恐袭。例如劫机，或成间核电厂俾人炸咗，之类。平常的食食下饭俾人开枪，防不胜防。

吊诡嘅系，往往系“唔理就冇事”。恐怖分子除咗“崇高”或“狂热”理想外，好多时亦系 attention seeking。有个定义讲，恐怖主义定要有政治诉求，但若搞件事出嚟冇乜人理，大家习惯晒，新闻 A18 版先报，佢搞事的动力反而又降低些少（唔会变冇）。同样地，想借恐袭揾钱，亦因为金融市场“习惯”咗，而变得不太可行——虽则我估只有拍戏，先有人纯为金钱而恐袭。

港人外游，就唯有小心。但其实都冇乜得可以点小心。冇得点防，反而令你安心。谂嚟做乜？

我甚至开始怀疑，小型恐袭愈嚟愈密，迟早有保险公司唔介意赔钱。反正日日都恐袭，杀头生意有人做，而所谓“恐袭”与否，往往系官方说了算。

香港人嘛，成日外游，就需要习惯，个世界唔同咗。香港系福地，向来少天灾，罪案率低，恐袭冇乜。我同友人讲起搬去台湾住，不少人即时反应就系“会地震㖞”。正如我话去高加索（已胎死腹中），不少朋友都系问“危唔危险？”。

你同战乱多、恐袭多、或者天然灾害多地区嘅人倾偈，就知人性比你想像中坚强，或者系比你想像中麻木。经常出现，你就会 live with it。台湾人日本人不觉得普通地震系咩回事，有预防有训练，照常生活。希腊岛仔或瓦努阿图随时火山爆发，当地人一样 live with it。

正如当年手提电话拍摄功能愈嚟愈好，网站又多，开始有男女艳照“闪卡”流出，我当年大胆预言，将来大家只会愈嚟愈麻木，你传出去都冇人睇。除非你系陈冠希。真的，几十年前睇 TVB 𠮶啲“贴裸照”派街坊，而家真系好似冇乜作用。可能事主会学彭浩翔套《公主复仇记》入面的阿娇咁，讲句“影得我咁肥嘅？”就算。

大胆断言，未来 N 年，特别在欧洲，你会见到恐袭更加频繁，但规模更细。最后，大家只会习惯、麻木。金融市场更加懒理。如果不讲政治动机（但有不讲政治动机的恐怖分子吗？），单讲揾钱，应该恐袭亚洲。个别城市人口稠密，居民身骄肉贵，危机意识低，金融市场够深度，加上冇共同货币，沽空嘅分分钟又赚价又赚汇水。

希望将来唔使拎返呢篇文出嚟讲。

（本文纯属作者意见，不代表香港01立场。）