“已两个月没收入”- 本地 livehouse “ TTN ”面对疫情再次结业

本地 livehouse Hidden Agenda 自 2009 年创立起一直面对风风雨雨，被政府的政策影响一直变更场地位置，经历了五代的变迁。至 2018 年，Hidden Agenda 将场地命名为 This Town Needs（ TTN ）在油塘重新出发，两年来看似正稳步上扬，一众本地或国外音乐单位的演出都顺利举行，乐迷也看似重新有回一个聚脚地，但 2020 年一场武汉肺炎疫情爆发，多个音乐单位取消来港，没有演出，就没有收入... 今天 TTN 的 Facebook 专页发表长文，向乐迷再一次表示场地要无奈结束，大家也只能寄语：江湖再见。

TTN 于今天在 Facebook 专页发文，谈及过去两三个月场地因疫情受到严重影响，说到“ 所谓嘅香港演出业，实际上势单力薄，一个疫症冚埋嚟就会收皮。”

文中又提到场地已两个月没有收入：“ 拖欠租金嘅情况下，面对住几乎全数场次取消、改期，仲有康复香港无期种种不明朗状况之下，实在无办法继续营运落去。”

场地主办人之一阿和，他回复扭耳仔时说：“其实都仲想搞落去... 唉，真心，想再揾个新地方，我相信会有良心业主嘅。依家冇咗一个可以作为香港主办、可以容纳 300 至 400 人嘅场地其实好伤。”

不过阿和又说，现在只是实际场地结束，但 Hidden Agenda: TTN 的部分仍存在，仍会以主办单位的形式举办活动及协办活动。

大家如想向 TTN 这个经历几番风雨的场地作最后致敬的话，场地会于本月 27 日举行最后一场 live：“  This Town Needs Freak - H.J. Freaks Live in Hong Kong ”，支持 Hidden Agenda 、支持 TTN 、继续为本地音乐艺术空间和工厦问题发声！

以下是 TTN 的声明全文：

“如果可以再见再高都高攀 九曲十三弯 波折当三餐”

− Matt Force 《告别》

呢个时间选择告别，一定唔系我哋嘅初衷，或者连本身“系唔系一个选择”都值得商榷。

但事实系，我哋要同大家讲再见了。

唔知你哋有无睇过，我哋策展部OC2S费尽心思写嘅三篇万言书（见文末）。其实同大家讲咗咁多有关演出行业结构、营运模式、政策影响等等，都系想带出一点：

所谓嘅香港演出业，实际上势单力薄，一个疫症冚埋嚟就会收皮。

过去呢两个月嚟，我哋近乎系无收入。拖欠租金嘅情况下，面对住几乎全数场次取消、改期，仲有康复香港无期种种不明朗状况之下，实在无办法继续营运落去。需知道，喺本地经营独立演出场地真系好·L·重·皮，除非有政府或财团资助，本来就系吃力不讨好、叫好但又唔叫座嘅修罗苦行。

TTN自开业以来过五关斩六将办妥所有相关牌照， 添置好所有专业设备以来，一路都系入不敷支，亦无收过政府一分一毫补贴，你哋喺呢度度过嘅每一个难忘时刻，都系我哋一班手足耗费心力、财力一手一脚营造出嚟。就算每个月要倒贴一笔， 只要大家见到好似喺香港推得郁“音乐业”呢旧古老石山分毫，我哋都从未介意。

总结过去观察，香港举办嘅演出当中，不论本地还是外国，都不乏优质内容。比较可惜嘅系观众口味市场不足，而观众群组嘅大小、忠诚度，会直接影响主办单位嘅决策、风险管理，以至存亡，继而反映喺互相依存嘅场地。咁样环环相扣底下，行业每一部分嘅持续发展都系关键。

当日成立This Town Needs嘅初衷，系团队认为，呢个城市值得拥有一个独立创意艺术空间，去俾大家探索同容纳各式各样有待定义嘅文化活动。你当佢系一个“护苖基金”又好、“培植场”也好，都实不为过。

眨吓眼两年多过去，你话系咪搞得有声有色，一定系“不完美但可接受”，中间做嘅实验有得有失：同 Heroes Beer Co. 出只劲正手工啤、同 nomad nomad 玩真文青市集、搞学术台放映会、indie新秀音乐会、动漫毒L劲舞团、保险界卡拉OK......好似玩AOE咁，往往喺最意料之外嘅情况下揾到条新路。最重要嘅系，我哋始终俾到个稳阵嘅场出嚟，令呢个空间满载住无数嘅对话同故事。

喺呢度，我哋要多谢合作过嘅主办单位、各位观众、愿意相信我哋嘅赞助商，同所有一路上帮助过TTN嘅人。2月27号嘅 This Town Needs Freak - H.J. Freaks Live in Hong Kong 会系我哋呢个场地最后一场演出，希望大家唔好忘记TTN同Hidden Agenda，继续关注本地艺术空间尤其系工厦政策嘅问题（挣扎arrrrrrh！）。

祝身体健康，有缘再会。