翁三姑的9+1：《黑社会主义好》个概念，系同我爸倾计谂到！

不是米奇老味神奇屋蜜蜂翁，他是情歌王子翁三姑，虽然缺乏恋情经验，但是一个资深的情歌乐迷！看看翁三姑的9+1专辑推介。

告诉我十张影响你毕生的唱片──不，九张便行，加上一张你有份参与的，唱弹或编制，专辑或单曲也好，对你的影响不输任何经典专辑吧？

扭耳仔新栏目9+1，每周找来音乐人物，抄录他们的聆听喜好，看其所爱，听其所听。

A0，情歌王子翁三姑。

1. Taylor Swift 《 Speak Now 》 (2010)

我钟意Taylor swift 𠮶啲旧歌，尤其是呢只又pop又country ，两种好多人讨厌嘅音乐genre。我觉得其实好多人钟意Taylor swift ，系因为佢地唔钟意Taylor swift 𠮶啲听众，反而对Taylor swift啲歌有冇乜大问题。我梗系觉得好容易听，一听就钟意唔使听20次三十次先发觉原来系好有深度或者好有创意𠮶啲，唔使嘥时间培养呢啲感情。即系好似喺沙滩见到一个THOT嘅时候，就识欣赏佢嘅美丽，唔使倾计就可以好有feel。同一时间你越听就越知道呢个女人，我系唔会同佢结婚生仔，只不过系欣赏佢嘅美丽。

2. The Killers 《 Direct Hits 》 (2013)

我好钟意The Killers 佢哋𠮶种风格，无论佢哋新𠮶只或者旧果只专辑，我都觉得佢哋好保持到佢哋𠮶种嘅style同埋都好好听，呢个其实系好罕有。里面𠮶啲歌𠮶啲旋律系好独特，好难揾到呢一种声音系其他Band入边。其实谂过想唱〈 Mr Brightside 〉 系三姑 season 2 但系可惜香港冇乜人识欣赏呢一对band。仲有就系佢哋𠮶只圣诞碟其实超好听，不过无人听。

3. The Low Mays 《 黑社会主义好 》 (2017)

我谂呢只唔使讲咁多啦，根本就系香港乐坛历史最震撼𠮶只专辑。同埋其实黑社会主义呢个概念，系有一次同我爸倾计谂到。

4. Pink Floyd 《 The Wall 》 (1979)

我觉得 《 Wish you were here 》其实好听啲不过《 The Wall 》𠮶个题材讲开 loneliness 同埋明星生活外面多姿多彩，其实内里充满烦恼系非常之relatable。 𠮶个人其实生命入面嘅梦想、遗憾、伤痛，同埋快乐都系冇人可以感觉到，但系同时间个个人都可以感受到果种嘅loneliness，就系我觉得呢个专辑嘅特点。

5. Serrini 《 Don’t Text Him 》 (2017)

我第一次听呢只碟，简单谂咗下WTF？但系越听越好听，听听下就喺度唱，唱唱下就变咗个女人。 我听完呢只碟之后，就觉得我需要讲返，其实系爱情上面做男人都唔系咁简单，有fucc boi 自然梗系有fucc girls, (不过社会叫佢哋strong and independent woman)，所以我就决心要做好三姑比啲男人有返把声，唱下佢哋嘅心声。唔可以比serrini 系咁乱咁讲话，所有直男都系fucc boi 其实大部份嘅直男都系三姑。

6. Air Supply 《 Making Love ... The Very Best of Air Supply 》(1980)

我细个𠮶阵时爹哋妈咪揸车剩系得一饼带喺架车度，就系呢个专辑。由细听到大，而家再听返系会非常怀旧谂返，我坐系架波子𠮶啲皮凳上面𠮶啲回忆。我阿爸仲话佢追我阿妈𠮶阵时，整咗啲mixtape比我阿妈然后入边都有啲Air Supply，所以我喺度笑老豆追阿妈𠮶阵时send啲分手歌比佢听？

7. the Script 《 Science and Faith 》(2010)

我阿哥去咗外国留学𠮶阵时，开始识听啲英文歌，跟住佢就介绍咗几首𠮶阵时几红𠮶啲歌，有一首〈The Man Can’t Be Moved 〉系我细个𠮶阵时最钟意听𠮶一首歌。我间小学好怪，要迫学生睇场音乐会，跟住要写歌report 讲感想。个次我唔记得咗睇，但系啱啱好The Script 嚟香港开show，所以我就用呢个借口睇我咁大个仔第一场嘅live音乐会。虽然果次佢哋未红，唔系好多人去睇而且我记得系AsiaWorld-Expo好似得半个场左右，但系我印象都好深刻。依家佢哋红咗，啲歌又麻麻哋冇谂住睇返佢哋live，但系我唔会忘记𠮶次，佢哋香港细细地嘅concert其实仲好。

8. 周杰伦 《 十一月的萧邦 》 (2005)

细个𠮶阵时比阿妈迫学弹琴，所以细个𠮶阵时觉得音乐对好反感。大个咗有咗第一个MP3 player 𠮶阵时就开始欣赏音乐。呢个系我印象最深刻嘅一个中文专辑，之后我就开始听英文歌。

9. Coldplay 《 Viva la Vida  》 (2008)

呢个又系我阿哥介绍嘅一只专辑，喺佢留学𠮶阵时红到爆，《Viva la Vida》 系一首令我开始慢慢识听英文歌，所以虽然呢个唔系我最钟意Coldplay 𠮶只碟《Rush of blood to the head》但系我非常尊重呢只碟，系我人生嘅影响，如果唔系我 一开始就听Coldplay我都唔知我今日会唔会咁basic，一睇下呢几张专辑，已经知我系几咁basic，但系我又唔系好觉得好差，因为pop 系popular即系好多人听姐，如果你钟意大众嘅嘢咁咪即系多啲人可以一齐欣赏，咁咪几好啰！

+1 翁三姑《 独·姑踪 》(2017)

我第一只大碟，其实对我来讲系远远超越左我所有期望。我根本唔系一个音乐人，我唔识数拍子，中文程度差到贴地，完全唔知自己点解要做啲咁嘅嘢，唱唱下先发现原来呢个系我生存嘅原因。我要唱啲已经唱过好多次嘅中文情歌，但系我亦都要(做)第一个(原)唱𠮶位三姑。歌入边𠮶啲声音全部都系自己唱，要自己整咗一只CD先明白其实每一首歌可以花几多心机落每1秒，每一把声，而家我系好欣赏同埋佩服𠮶啲真系自己写同埋自己唱𠮶啲嘅歌手。要靠自己嘅实力来红系真系好难，尤其是而家好多个都系跟返一个formula 咁写落去或者咁唱就会红，所以我咪跟返个formula 啰，做乜要做啲咁难嘅嘢？