【靖听音乐】结他手和他／她的形象｜黄靖

人哋话：“你的样子如何，你的日子也必如何。”

而作为一个做幕前嘅表演者，形象绝对系表演嘅一部份。当形象和音乐配合得天衣无缝，你可以帮观众更容易进入你音乐建构紧嘅世界。

如果披头四喺1967年推出𠮶一张《Sgt. Pepper's Lonely Hearts Club Band》唔系着住迷幻鲜艳萤光彩色嘅复古军装，我哋做观众嘅可能就感受唔到佢哋音乐世界的完整性。又或者David Bowie在1973年嘅时候唔系化咗一个闪电妆，佢嘅经典作品《Aladdin Sane》整个概念同埋音乐根本就唔成立，亦把glam rock的形象推到另一层次。

咁当然会有一啲音乐人觉得好多好叻好出名嘅结他手譬如Gary Moore，Ry Cooder，Tommy Emmanuel都冇乜讲究形象啦，佢哋咪一样咁劲？

Gary Moore同Ry Cooder 一个玩Blues一个玩Country／Folk，两个音乐世界都系玩朴素、玩平民，如果佢哋dress up先至觉得奇怪。至于Tommy Emmanuel技术高超到一个境界就真系着乜都冇人理啦！佢唔着衫都无人够胆讲咩。当然如果你做纯音乐你唔想有任何视觉元素扰乱观众，咁你全身着沉色黑色衫系非常合理，但系请留意呢一个选择已经系一个服装上的决定去帮观众投入你嘅音乐。

Jimi Hendrix当然无David Bowie去到咁尽，但系其实佢系形象同埋服装方面都非常讲究。佢嘅服装主要有两种，复古将军军装同埋松身幻彩嬉皮士；两者都赋予佢狂野爆裂轻狂嘅表演风格视觉上嘅压台感。而佢选择用一支正常right-handed嘅Fender Strat 结他反转弹亦都系一个视觉上嘅决定，一睇到就会觉得佢反叛。

至于我哋华人结他手嘅代表之一卢广仲都非常值得讨论；佢系我觉得形象定位做得最好嘅一个艺人之一。唔系卖靓仔嘅佢由出道一开始第一只专辑就选择咗疑似卡通片叮当里的大雄形象，十分亲民而且冇杀伤力，甚至乎系刻意降低自己嘅身位，视觉上都可以算系兵行险著。你哋谂真啲佢第一只专辑嘅封面上身著黄色衫、下身著蓝色短裤仔重要著及膝头嘅长白袜白鞋、加埋个冬菇头同埋巨型圆框眼镜，喺一般嘅情况绝对唔系会令人觉得“哗！好型、好Charm、好吸引”，但系佢投射出来的形象同佢嘅性格同埋佢嘅音乐成件事都太有说服力，再加埋重点系佢真系好鬼有才华，竟然令到呢个其貌不扬嘅后生仔成为一代宅男嘅希望，好似代表左宅男可以唔需要靠靓仔，靠实力都可以企出嚟争番啖气。值得一提嘅系佢连喺拣结他方面都贯彻佢可爱嘅形象，选择咗3/4Size嘅Baby Taylor，等佢揽住结他演出嘅时候更加可爱。

相反陈绮贞嘅形象都用咗好几年先至建构到出嚟。佢一开始俾人包装埋喺一堆美少女合辑《少女标本》出现，显得一点不起眼。好彩佢作曲填词自弹自唱嘅能力实在非常高，所以我都记得佢。后来唔知几时开始佢成为咗一代文青女神，而佢亦都有意无意地喺服装方面配合呢一个形象；你睇佢近几年啲演唱会每次都主要著一袭白色长裙就知，而且为咗配合文青最喜欢嘅〈旅行的意义〉。佢亦都系每一个演唱会必然佩戴一个十分怀旧外表嘅电单车头盔，等你将一啲有气质嘅形容词如游历、旅人、冒险、故事、女神一一变成佢嘅代名词。

香港我地自己嘅卢凯彤亦都非常有型；自从AT17暂别乐坛决定单飞之后，一直走比较中性简约暗黑摇滚感觉嘅造型。而佢喺个人演唱会中途当乐队演奏Radiohead嘅名曲Creep嘅时候喺舞台上现场剃头𠮶一刻佢终于完全蜕变成功。佢双手炸开嘅纹身同埋后来喺颁奖典礼出柜亦非常合理。

以上举嘅例子，有啲系刻意经营、有啲系顺其自然，但无可否认嘅系佢哋嘅形象同埋佢哋嘅音乐系非常之挂钩，有相辅相成嘅效果。

虽然人哋话：“你的样子如何，你的日子也必如何。”

但我更加相信自信带来的美丽。黄靖话：“你的自信如何，你的日子也必如何。”

关于黄靖：

唱作人/设计师, 曾推出3张专辑, 去过30多个城市巡回演出, 闲时写嘢自娱。