父亲节｜毕业问读中几、有咩都叫你问阿妈　8个香港老窦必备特质

【父亲节／父亲节快乐／老豆二三事／屋企人】每年母亲节四周总大锣大鼓咁庆祝，就连赛马都要为佢跑早一日，偏偏父亲节的势头就弱好多。但其实无论系爸爸定妈妈，系一个家庭中的角色都系缺一不可！虽然好多老豆都唔爱说话，亦唔会直接表达爱，但其实佢哋一直默默咁为家庭付出，更会尽量满足仔女的要求。今次《开罐Opener》为你集思一众老豆的特质，快啲睇下自己嘅老豆系咪其中之一啦！

讲起同老豆相处的回忆大家又会谂起啲咩？系做完坏事见家长，一齐同流合污，暪住唔畀阿妈知；每次食到啲难食又或者食唔晒嘅嘢，都会同你包底；定系明明已经毕咗业仲走嚟问你读form几的男人？虽然依啲事好似好无厘头咁，有时又会被老豆啲想当年搞到又无奈又忟憎，不过其实好多时依啲都系老豆表达爱的方式。

👇🏻👇🏻👇🏻点击图片放大看： 8个集思网民的天下父亲特质！👇🏻👇🏻👇🏻

【1】万大事有阿妈！

无论系屋企冇豉油、摇控唔见咗、定厕所有炸弹，总之所有屋企嘅问题，只要问老窦，佢都会一律答你“问阿妈啦！”最搞笑嘅系，如果你问佢点解坐系睇电视，可能佢都会答你“唔知㖞，问阿妈啦！”。

【2】中央食物焚化炉

每个有细路的老窦，都避唔开变肥的节奏，全因家中无论系食唔晒或是唔好食的食物，最终的归宿都会系老豆的肚腩。细个以为老窦乜都中意食唔拣择，大个先发现，其实佢只系想将最好食嘅留返比阿妈同自己姐。

【3】唔系唔记得，只系冇记著！

老窦好多时都好似小巴司机咁，明明听咗你叫“有落！”，但转个头又唔记得咗，话你冇讲过。当你以为佢冇记性咩，偏偏阿妈啲嘢又记得好清楚㖞，𠮶一刻你先发现原来佢只系选择性记著，而唔系唔记得。不禁令我感叹一句，果然系亲生嫁！

【4】入睡能力者

唔知点解每个老窦都好似冇任何失眠问题咁，每次搭车定坐定定，只要一有时间，就可以瞬间进入深层睡眠，过程行云流畅，毫无多余动作！最记得细个同老窦玩迪士尼的小小世界，Hello个堆字先啱啱过，佢就恰著咗……

【5】家庭版IE

每个老窦系接受资讯方面，唔知点解总系慢半拍，就好似家庭版嘅IE咁，明明你今年都毕业，佢仲会问你读form几，做紧嘢嘅话就问毕业未。千祈唔好奢望老窦会记得自己系咩班，基本上帮你签到通告已经可以颁加许奖。

【6】同流合污的共犯

唔知大家有冇试过做咗衰嘢，怕畀阿妈知唯有叫老窦嚟，点知对方唔单冇闹你，仲帮你保守秘密，甚至衰埋一份的经验！自此就同老窦建立咗坏事联盟，暪住阿妈细声讲，大声笑，大概每个老窦心中都有一个长不大的男孩！

【7】最钟意“想当年”

相信唔少人的老窦都几钟想当年，仲要每个老豆的当年都总系有啲威水史咁，再唔系就回忆一下自己挨穷的日子，以前成日觉得佢想寸自己唔挨得，依家先发觉或者佢可能只系想揾个人陪佢倾下偈姐。

【8】行动最实际

亚洲人的社会本就比较内敛，作为男人更加少会以言语去表达自己的想法。虽然老窦总系话不多，但其实佢做的每件事都系默默为家庭付出，以行动表达爱。就好似仔女提出的要求咁，佢都不问为何尽量满足，绝对是大家最坚实的后盾！

其实老窦们做咁多嘢都系为咗一家人嘅生活过得好啲，虽然不擅言辞，但大个咗就知佢用心良苦。如果大家嘅爸爸仲可以不断想当年嘅，下次不妨唔好嫌佢烦，坐低陪下佢倾倾偈，饮饮茶，珍惜大家一齐相处的时间，再同佢讲句父亲节快乐啦！