小编斗胆估计，应该好少人读中学𠮶阵系未出过猫。有“连登”网民发起讨论，一齐回味下当年有心思谂点出猫，但死都唔温书嘅中学回忆。小编集合咗15个出猫方法，你以前试过边几样？
【1. 摆本书喺地下直接抄】网民话试过默书𠮶时，老师坐喺位读课文，形成一个绝佳嘅出猫机会！不过呢位老师居然发现唔到地下咁多本书……睇嚟平时都系畀学生恰多。（《出猫特攻队》剧照） 【2. 交换答案】有时出猫都要同同学合作，抄哂啲答案喺问题纸，然后同其他人交换，仲可以每人负责唔同部份添。所以话得朋友得天下，有个同你一齐出猫嘅朋友简直系如有神助！（《出猫特攻队》剧照） 【3. 将高分嘅试卷传畀大半班人抄】有好嘢紧系要益大家喇！电视剧入面啲学霸永远都系孤独精，呢位学霸就醒喇，独乐乐不如众乐乐呀嘛。（《那些年我们一起追过的女孩》剧照） 【4. 用笔尖大力抄喺本默书簿】咁样默书𠮶时就可以跟住啲字印写！不过呢个方法只限默书～而且前提系本默书簿喺你自己度，根据小编嘅经验，呢个唔算系高明嘅出猫方法。（《出猫特攻队》剧照） 【5. 将答案化为密码写上黑板】最开心就系隔离班早测验过你𠮶班，因为可以通水！有网民就试过将通水返嚟嘅MC答案变成code，例如ABCD变1234，然后写上黑板。细细个已经咁有写code天份，将来一定系个很有用嘅IT狗～（《内衣少女时代》剧照） 【6. 女仔限定】骗徙技巧真系层出不穷！女仔可以拎支蓝笔写哂落自己大脾，默书𠮶就可以扯高少少条裙睇。仲有人发梦见过阿Sir叫啲女仔暮短裙去考DSE，去厕所可以偷睇摄入底裤嘅猫纸。咁都得？！(《学校2015》截图） 【7. 连老师出埋一份】边个话老师同学生一定系对立？有网民嘅中学校长规定学生一定要背《弟子规》，仲会喺lunch time巡楼突击检查，有Miss都知呢个校长难顶，就帮学生印定猫纸摄落水樽。（《朝5晚9》截图） 【8. 光明正大咁抄书】自称系毒撚网民话，直程将本书放喺台面抄，点知老师连望都冇望过佢。睇嚟呢个网民毒到连老师都觉得佢唔会有胆做坏事。（《出猫特攻队》剧照） 【9. 科长只手遮天】以前好兴每科都有个科长，如果个科长同大家企喺同一阵，咩功课呀、默书呀就易搞好多。有次默完书，老师叫科长交换同学嘅默书簿，科长直接派返畀同学自己改，想唔合格都难喇！（《那些年我们一起追过的女孩》剧照） 【10. 上小卒下载试题答案】唔知而家仲兴唔兴小卒论坛，小编𠮶个年代就一定会上小卒download啲笔记同试题温书。入面仲有试题库，有唔同教科书嘅练习或者模拟测验嘅答案download！如果咁啱老师拎咗嚟做测验，咁就爽喇！（《奶酪陷阱》剧照） 【11. 无印笔袋收埋猫纸】以前返学一人一个无印笔袋，佢啲透明笔袋仲系出猫神器！先放猫纸入去，想睇𠮶时就扮揾笔。不过呢个方法都几高危，万一你个老师好眼利就麻烦啦。（网上图片） 【12. 抄答案落默书薄嘅纸】一定要揾同默书薄一模一样嘅纸，先完成到呢个出猫大法！默书𠮶时就放张纸放喺隔离𠮶页，直接抄啲答案落空𠮶版，扮哂蟹咁做第二版！（《出猫特攻队》剧照） 【13. 当TA冇到】以前中学最期待就系老师冇返，TA嚟代堂！如果𠮶堂系默书，大家就会蠢蠢欲动要出猫……有网民话一早知TA会嚟代堂，小息将背默嘅课文抄喺白板，TA仲要完全唔发觉有问题，结果全班就望住白板抄哂成篇课文喇。（网上图片） 【14. 突然企起身昅前面】突然好想睇前面同学嘅答案点算好？网民就话佢直接企咗起身！老师问佢乜事，就不慌不忙咁话：“我脚痹”。不过呢个行径真系几易穿煲，睇怕都系一向曳开嘅同学先敢做！（《出猫特攻队》剧照） 【15. 高科技出猫】背默最容易出猫，旧年代可以用手机录底课文，将耳机摄入冷衫，全程托头就可以听到篇课文喇，近几年直程用埋AirPod添！（《回答吧1997》截图）