【陆小菲相谈室】原来消防员都会着T-back返工
咁啱返咗香港，咁啱又要食饭，咪倾大家一路开计一路倾饭啰。每次一间餐厅一餐饭一个故事，而今次就系一个关于消防员着T-back返工嘅故事。撰文：陆小菲
【文章原刊于01撑场，欢迎下载香港01 app，与星级作者一同讨论喜爱话题。】
话说小菲个BFF失惊无神一支箭咁飞返香港，小菲都唔执输买到张平机票跟埋返去见下啲老朋友。事先声明，唔系亚洲菜都一一唔食，平时食惯德国肠送电视，如果返到嚟都要食西餐真系好唔尊重香港啰。
小菲听人讲老锅台式火锅唔错，加上尖沙嘴够就脚，而且近地铁站，起码成日喺地铁站度轮回地狱又折返人间嘅小菲都识得去。一台四个，好耐无见。由于小菲喺油麻地同黄埔之间来回咗三次，所以煲底已经拣好，菜都上埋，系未开始食已经算系好畀面小菲。
净系屏风个通花已经够中式，加埋啲昏暗嘅灯光真系暗到成脸油光都睇唔到呀。成台人入面，小菲最耐无见都系打对角坐嘅Louie。唇红齿白加埋一个阳光男孩嘅笑容，如果有一日唔再做烈火雄心，小菲都真系叫佢去选香港先生呀，话晒都做过救火英雄㖞，骚肌都够尖叫啦。小菲着住条深蓝色嘅COS，对面两位哥哥仔都一样着白色同灰色T-shirt，猛男嘅dress code真系唔怕打边炉会弹污糟。
各位观众，唔好FF住，Louie择偶条件都好高，如果唔系小菲都放张相出嚟收吓媒人利是顺手益街坊。
“喂，不如你讲吓你返工见过最大镬嘅嘢畀我知？”
“返咗咁多年先问？”做咗消防员一段时间嘅Louie一边讲一边将CAB安格斯牛小排放入个炉度。“你唔系𠵱家先嚟睇中我呀嘛？”
佢紧系讲笑。我哋呢台人青梅竹马识咗廿年，有儿女私情难过中六合彩。
小菲无视佢继续追问：“咁最核突见过乜？”
“都系死尸㗎啦。跌落嚟会分散晒。”大学界的少女Winola终于出声。
牛肉拎得上嚟，不过当小菲系男人嘅佢当然无畀我食先。但都放咗两只广岛蚝落去渌畀小菲同Winola，系呀好gentleman㗎，有兴趣嘅话可以私信小菲。
工程师大只仔Eugene问系唔系直入黑箱车唔驶经消防。
“有个帐篷，之后有仵作……”小菲呢啲时间紧系冲出嚟柒。
“仵作系验尸㗎，𠮶啲叫仵工。其实有啲都系消防执，个个做新仔都执过。睇吓land喺边，如果喺podium都系我哋执，仵工剩系执平地。”
言谈间问吓有无伙记试过睇到顶唔住要呕，Louie话无咁夸张。小菲问佢脑浆咩色，Winola话Bio堂咪教过啰，Louie接住指住台面碟羊肉，指落啲脂肪度话“就系呢只粉红。”
“平时救火你到底做咩角色？”大只仔Eugene问啲问题系畀小菲合理少少嘅。
“‘走呀！走呀！’带头走𠮶个。”
大家追住问山火系咪好难救？边度边次𠮶场大火你做过啲乜？Louie都答得好清楚，甚至教埋我哋乜嘢系“Fire Loading”（火灾负荷），今次真系长知识了。
“其实最常救都系垃圾火。”小菲觉得几好啊，唔系成日有大单嘢其实都系好事。
“救返个垃圾筒其实都好伟大。不过你地成班人去到睇住个垃圾筒烧呀？”
“系呀我地轮住用脚踩熄佢㗎。”Louie接住话：“不过有时香港人连烧烤场有烟都要报警，所以都无办法。你做咩忽然咁有兴趣？好似啱啱识咁要追住问‘点解你哋要打排球嘅？’”
“𠮶啲低级问题我三岁就问咗啦。我紧系问啲古灵精怪嘢，例如你哋可能会有话着咩色底裤无咁邪之类嘅嘢㗎嘛。”
“打麻雀咩𠵱家！”
生命悠关㖞，好多时候都会迷信㗎啦，虽然Louie话无啲咁嘅事，但小菲深信应该真系有啲同袍会有自己幸运秘方嘅，拜得神多自有神庇佑嘛。
嗱，虽然Louie口讲话痴线点会留意人哋着咩底裤，但最后都讲咗畀我地知有条友仔着红黑心心T-back返工，而关系于工作上见过最恐怖嘅经历都系关呢个哥仔事。Louie透露有次打完排球，同平时一样大家玉帛相见，大家都拎住条毛巾去冲凉无咩避忌。习惯着T-back𠮶位人兄竟然对住某同事讲：“你𠮶度好靓。”呢啲比救唔到火更大镬嘅关口真系要好强嘅心脏先过到，三魂唔见七魄；靓㖞，咩意思呀究竟。路过畀人鉴赏，都几老尴。Louie话男人老狗最多一齐笑住讲吓边个好劲抽，但以观赏嘅角度出发畀人话自己个兄弟“靓”，呢个咁到位嘅形容词真系就算系对于见过晒大场面嘅消防嚟讲都真系太过勇猛喇。——注：小菲好明显知道，通常啲人讲话啲朋友乜乜乜嘅时候主角系自己，当然小菲识相无拆穿。
但小菲在意嘅系，原来消防员救火会热到呢个地步？
“吓？点着T-back返工呀？外边着制服舒服咩？”
“喂，唔通要我问佢你怕唔怕条裤刮亲你屎忽咩？”
呢坛嘢真系倾到埋单。对于只系喺香港打过港式边炉嘅小菲嚟讲，台式真系舒服好多。加上𠮶种同台湾无老锅一样追求黑得嚟打返少少灯嘅光暗度真系好舒服；只系呢种比港式鸡煲斯文嘅环境唔太适合小菲返到香港尽情爆粗嘅意愿啫，火锅又点会够打边炉豪迈呢又（小菲母语系广东话）。
最后，小菲谂起德国有个薯片广告系用好HOT嘅消防员半裸跳舞热辣辣嚟卖新出嘅辣味薯片。小菲以为条人鱼线已经够杀，只系无谂过消防装下面同入面竟然可以系睇落应该唔太实用嘅T-back。后来问清楚Louie先知原来消系防无规定着乜underneath嘅，但佢怕住羞咁话多数着三角裤啰，始终着boxer同brief有汗时唔系咁舒服嘛。
势估唔到有人着T-back咁HOT呀吓！不过咁样讲一讲，相信各位少男少女嘅幻想真系出晒嚟。希望伟大嘅消防哥哥着T-back救人𠮶阵小心啲，唔好刮亲个 pat pat就好喇。
【编按：文章题目为编辑所拟，原题为“【陆小菲相谈室】第一回：无呃你消防员真系好HOT！烧烤场有烟都要出动㗎！”】
（文章纯属作者意见，不代表香港01立场。）
作者简介：陆小菲，一枚性格分裂小毒女。人前沉迷动漫和美剧，人后忧郁自闭；自管自顾的超译人生。只谈月说风花，不聊明天以后；其余的，就随便吧。