【毛孩与我】身在彩虹桥也希望主人快乐　Cherry：谢谢让我学懂

爱护动物无分国界，《香港01》宠物频道及其facebook专页欢迎你投稿。本文由Cherry再次投稿，鼓励失去主子的各位，不要太伤心难过，主子在彩虹桥也能感受到你的爱。

大家好，我系Cherry，我养咗好耐（由2个月大养到17岁）嘅狗狗黄宝宝，喺上年年底因肾病离开咗。时间过得好快，咁就1年啦！我从来都无忘记过黄宝宝，但系宜家我唔会再喊，我要好好生活咁畀黄宝宝睇，佢永远都会喺我心中。

送信给移民去了汪星国的黄宝宝​

喺汪星国嘅黄宝宝，你现在如何？一切可好吗？时间过得好快，今日系你离开我刚刚一年嘅日子，24/11/2017～我永远都唔会忘记你离开𠮶刻。之前你喺到嘅时候，我会好忙碌，每晚返来要同你清洁，喂饭，喂药，喂食保健品，打针，比你坐轮椅，有时忙到自己饭都唔记得食，日日都好累好累。现在想起这些日子，虽然好辛苦，但好值得。

更多宠物文章：【毛孩与我】一个照顾狗狗终老故事　Cherry：唔好轻言放弃

由知道你有肾病开始𠮶刻，我唔知你仲可以留低几耐，医生唔知，你我唔知，无人知道。我心只想尽力照顾你，能照顾你几耐得几耐，点都要照顾好你，我同自己讲绝对唔可以畀自己有遗憾，我真系做到了。谢谢你。

教晓我永不放弃

黄宝宝谢谢你嘅坚强，永不放弃嘅精神，病发时你表现好坚强，睇医生前一晚仲同你去影紧相同BBQ，当时你依然系表现好正常，无任何身体不适甘，但第日去医生到抽血，医生话你已经好严重，根本一啲都睇唔出。如果唔立即入院唔做任何治疗，你应该剩下嘅日子唔会多。医生话可以做嘅系吊盐水，睇下毒素有无回落，有嘅话剩下来的就靠你自己了，没有回落嘅话，已不用多说了......。

好彩立即入院吊盐水，好彩毒素回落咗，之后嘅时间都系你一路坚持住。病开始时你都食得、瞓得，一切都大致正常，只系比较累同瘦咗好多。其后开始唔太肯自己食饭，要喂食喂水，行路开始不稳，脑退化了日夜颠倒，不停大叫，跌跌碰碰行不稳。直到后期完全行唔到要坐轮椅，离开前一星期要靠氧气机呼吸，同埋已不能再自己排出大小便，全部都由我同爸爸帮手处理。

等主人回家见最后一面

直至你离开当日，我回家不到30分钟你就离开了，仿佛你好似一直在等著我回家，一直撑住等我收工，回来见埋我最后一面。直至你在我面前，呼出最后一口气，那个画面真系好崩溃、好伤心、好难过，心情难以形容。我明白你离开系对你最好的，以后再冇病冇痛，现在仲可以开心咁喺汪星国同彩虹桥生活。

将爱永留在心中

黄宝宝你放心啦～你离开初时，我想起你或睇到同你同病相怜嘅狗狗我就会哭，好难过好心痛。现在想起你，我无再哭了，不是我唔难过，唔伤心，系因为已经将你放喺我心里面，系活在我们心中。

现在去到那里或是曾经同你到过嘅地方，我同爸爸一提起呢个地方都会好开心，会回想起同你一齐好多嘅回忆，好开心，好快乐。自你病发后，我地知道你好喜欢出街，我们带你出多好多街，去多咗好远嘅地方，希望能带畀你开心快乐，和我们一个美好回忆。

更多宠物文章：【毛孩与我】当宠物踏上彩虹桥　过来人分享6件事你要准备

宜加同爸爸讲起，呢度我地同黄宝宝去过……𠮶次佢系呢到坐轮椅，𠮶次佢系呢到小便系我身上，𠮶次佢系呢到瞓著咗……现在回想起黄宝宝仲有好多好多，好温暖，好窝心嘅画面，黄宝宝我不会再对你伤心同难过，我会将对你嘅爱放系细佬福先生身上，会收起悲伤难过，相信你喺汪星国系会睇到，会感觉到。

你见到我快乐，相信你都一样会快乐。黄宝宝虽然我现在不能拥抱你，不能拖住你，再带住你游山玩水，但我会继续带住你同黄菲菲嘅公仔再四围去，旁人系唔会明白我，以为我可能系傻傻地，带住只公仔去不停影相，但我系唔会理人点睇㗎。

感谢你让我学懂

哈哈哈......黄宝宝我爱你，谢谢你畀我一个学习照顾你嘅过程，令我明白好多嘢系要珍惜，活在当下。黄宝宝我现在好好，不用再担心我同爸爸，我哋会好好照顾细佬，将爱带畀有需要嘅人和动物，我相信直到有一天我们会在某地再相遇......

希望失去了主子既大家都要振作， 伤心难过总会有，时间会过去的。大家都要努力，加油吖。