毛守救获10只小型玩赏犬 疑遭黑心繁殖场遗弃 为历来最大规模
犬只遭人遗弃的事件时有发生，毛孩守护者前日（24日）在新界元朗、天水围拾获大批被遗弃狗只，大多属尚未绝育的小型玩赏犬，身体状况恶劣，义工猜测犬只来自非法繁殖场。
【9月26日更新】毛孩守护者在元朗屏山救获第11只疑遭繁殖场弃养的狗狗。
元朗出现大批小型玩赏犬
《香港01》访问本地动物组织毛孩守护者（下称毛守）创办人陆家捷（Kent），他指出现时已经救获10只弃狗，“我哋收到五、六个唔同嘅电话，每个都话见到马路有啲狗走嚟走去。寻晚（24日）就喺坑尾村草丛度执到两只，其中一只走咗入石屎厂，后尾捉番。跟住收到另一个求救系喺元朗公园对面油站附近， 有一只被车撞伤，喺果度又捉咗两只。而佢哋个样都好接近。佢地全部小型玩赏犬，未必系纯种，有啲系芝娃娃，有啲好似系约瑟沟西施，个样都系得意嘅。”Kent已经把遭车撞伤的狗狗送到兽医诊所，幸好只是皮外伤，筋骨无大碍。
“我地喺周围再揾，揾到好夜都无再揾到。”Kent当晚不停接到求助电话，忙于帮助街上的狗狗，至清晨四点半才停止行动。至昨天（25日）又再收到新的求助电话，“今朝（25日）又收到求救。天水围有三只，坑尾村有两只，元朗公园又有一只。我地不停收到电话，话喺街上见到小型长毛狗。我一睇到已经觉得好奇怪，因为呢啲小型玩赏犬好少会喺街上流浪，佢地根本生存唔到。好明显系有人丢出嚟。”
健康情况恶劣
毛守拾获的犬只全部无芯片，年纪估计超过八岁，Kent认为狗狗九成来自非法繁殖场，“全部（狗）指甲好长，代表佢地长时间困笼；全部皮肤好差，发炎、甩毛，长毛嘅打晒结，好污糟；全部好肚饿，营养不良，超级瘦。所以一定唔会系合法狗场嘅狗，因为渔护署会吊销佢牌照。”从牠们的身体状况来看，过去明显被人疏忽照顾。其中一只健康情况最差的，眼睛已经受感染而萎缩。目前Kent已经带牠们看医生，并安排寄放在暂托家庭。
“有九只囝，一只囡，全部都未绝育。所有囝一入笼已经下意识会对狗囡做交配嘅动作，好明显佢一向都过开咁样嘅生活。”大多数繁殖场饲养的犬只都以雌狗为主，不过这次Kent却拾获大批雄狗，他最初亦为此感到奇怪，“可能狗公无咩用途，所以丢晒出嚟，费事晒米饭，而狗乸就可能卖咗畀人。”
疑与139B修例有关
问及Kent对于非法繁殖场弃狗的看法，他认为跟2017年修订的“139B”有关，他指出，“139B修例已经实施咗，呢啲情况都系预计以内。非法繁殖场都好难生存，因为所有卖狗嘅都要有牌，渔护署又会放蛇，除非系黑市私下买卖，如果唔系都会有影响，佢地生存空间少，唯有将啲狗丢出嚟。”新修订的香港法例139B章《公众卫生（动物及禽鸟）（售卖及繁育）规例》于2017年3月20日正式生效，繁殖及售卖狗只，都要申请牌照，否则最高可被罚款10万元。
“（以前）间唔中有，我地执过好多名种狗，松狮狗、曲架狗、史纳莎，佢地都系来自繁殖场，不过今次系比较大批、大规模。其实我地未必执得晒啲狗，我估计被遗弃嘅唔止十只。”Kent指出是次救获的犬只外貌相似，而且出现时间、地点接近，相信来自同一繁殖场，他感慨地说道：“佢地都好可怜嘅，一直都做交配嘅行为，可以想像到佢地之前嘅生活系点样。部份性情都唔系咁温驯，好似畀人打过咁。”Kent亦希望透过报导，让大家明白繁殖场的无良之处，“其实佢地咁细只，流浪真系生存唔到，而且佢地唔系放喺个笼度，就咁放喺街，佢地会冲出马路。”
难以送交执法部门
根据香港法例第421章《狂犬病条例》，遗弃动物是严重罪行，最高可被罚款10,000元或监禁六个月。可惜根据Kent过往的经验，警方要成功执法绝非易事，“ 因为佢哋无芯片，好难追查到啲咩，最后只会不了了之。渔护署都只会当佢地系流浪狗，交佢地出去可能都系死路一条，大多数流浪动物嘅路都系咁。”
“我希望执法部门可以认真处理，包括渔护署、警方，其实弃狗系违法嘅，不过成功检控的数字好低，呢样野系直接影响到动物嘅福利。佢地全部超过五个月，无打针、无狗牌，香港受狂犬病条例保护，所以佢地对公众卫生有存在风险。”Kent认为执法人员加强打击的力度，才能避免动物受到伤害，他慨叹指出，“拯救只系无办法之中嘅办法。如果（执法人员）唔做任何野，每个人都会咁样弃狗。就好似因为打劫要坐监，所以大家会惊，如果打完劫都唔洗坐监，相信好多人都会打劫。”他认为进行检控的情况不多，令法律失去了阻吓力。
盼得好心人收养
毛守至今仍收到求助电话，不过单凭市民描述，未能肯定牠们来自同一批狗。虽然狗狗们身世可怜，但仍有不少热心市民鼎力相助，全部狗狗亦都找到暂托家庭照顾。Kent表示，“我哋要隔离十四日，先可以放佢哋入狗场，因为新狗如果有传染病，可能会传染到畀其他狗，所以我哋都唔敢放佢哋入场。宜家唯有送去暂托家庭，而佢哋首要嘅条件系，照顾到佢哋（狗狗）之余，自己屋企亦都无狗。”
“佢地健康情况稳定就会打预防针，全部都会落返芯片。”待牠们的健康、性情都稳定下来，Kent便会为牠们开放领养，“因为佢哋身型细，而且得意嘅，应该成功出领养嘅机会好大。只系要帮佢哋冲凉，执返靓仔就得。”虽然有部份狗狗面对人类都显得比较恶，不过Kent有信心只要相处一段时间，牠们便会重新接受人类。
《毛孩子：我们的故事》再次希望狗狗脱离繁殖场魔爪后，能够找到一位爱钖牠们的主人，幸福快乐地渡过余生。