【每逢大事讲故事】没有阿勒颇　赛马同推理小说可能冇咁刺激……

云集全球精英的国际大都会，各国商人趋之若鹜的商业、货物转运中心，繁荣、富庶、先进，东西文化交流要道，华丽建筑物林立……以为是香港旅发局或向强国客推销的楼盘广告？Sor，呢几句内容讲嘅唔系香港，而是近排大家成日在新闻听到的阿勒颇。
你无睇错，系阿勒颇。

飞云相信大部分港人一样，平日工作繁忙，但都会留意下世界大事，花几秒䁽下国际新闻……嘅标题咁啰，志在同客仔或老友吹水多个话题咁啫，叙利亚？中东成日打仗㗎啦，隔咁远，都唔会打到嚟呢边，关我咩事先？

当我喺FB见到Omran Daqneesh，即系果个成面灰成面血果个叙利亚男孩，系好惨，都好同情，但战争嘅嘢我控制唔到㗎大佬，我唔系无国界医生，又唔系刘大尉，更加无超能力，想捐钱又唔知捐咗去边度，真系爱莫能助啰系咪先。

我不是刘大尉

衰就衰在唔止飞云一介平民系咁谂，连各国领袖都挠埋双手阔佬懒理。马照跑，舞照跳，女照沟，yeah！西方国家自扫门前雪，醒目仔普京心谂：“机会嚟喇飞云！”把握时机出兵，将叙利亚揽上身，到全世界发现嘅时候，已经太迟。

一个人的圣诞

本来就算系咁，都唔关我事（系，我认我冷血），圣诞聚会特多，直到畀个关心世界大事嘅靓女兜口兜面问我：“咁你点睇阿勒颇？果度啲人点算啊？”，向来口若悬河的飞云，只能苦笑以对，然后眼白白看着大好机会流逝，从靓女失望的眼神，哎，今个圣诞只好食自己了。

为免犯下重复错误，唯有将勤补拙，研究下呢个鬼地方。点知一睇之下，不得了，阿勒颇横睇掂睇都好似香港，其实唔系，因为呢个地方，比起香港历史更悠久、更繁荣，直至2011年爆发内战前，佢地同我地无咩分别，得闲放假行下商场或者去郊游……

丝路重镇　坚‧国际大都会

介绍返，早在5000年前已经有人聚居嘅阿勒颇（Aleppo），系现存世上最历史悠久城市之一，仲劲过伦敦同巴黎。由于位处地中海与幼发拉底河（River Euphrates）之间，地理位置优越，公元前1800年成为雅姆哈德（Yamhad）王朝首都，之后不同王朝更迭，无论罗马、拜占廷还是鄂图曼等帝国治下，阿勒颇都是繁盛大都会，亦是丝绸之路西端重镇。

在这里，拥有全球第一批领事馆和贸易办公室，威尼斯、英国、荷兰、法国、印度商人挤满街，买卖丝绸、香料和马匹。讲起马，不得不提14战全胜退役的一代欧洲马王范高尔（Frankel）。

没有阿勒颇　英国赛马没有今天

这匹被誉为“马界保特”嘅英国纯种马，祖先正是英国商人戴利（Thomas Darley）在1704年由阿勒颇购入的一匹阿拉伯种马Darley Arabian，经配种后改良为速度高、灵巧而斗志旺盛的纯种马（Thoroughbred），至今经历25代。这还不止，科学家研究后发现，英国95%雄性纯种马都是Darley Arabian后裔。

单在英国，赛马、育马每年相关直接收益有成300几亿港纸，老土讲句，英国以至全球赛马事业有今日，全靠阿勒颇咋。钟意玩血统嘅马迷，不妨留意下，香港有边只马也可能是Darley的后世子孙。

Agatha Christie灵感地

唔好意思，讲马讲得兴奋得滞唔觉意扯远咗添，总言之，可以想像得到阿勒颇想当年的繁盛境况，连莎翁名剧马克白（Macbeth）同奥赛罗（Othello）都特别提到阿勒颇，著名侦探小说作家Agatha Christie也特别到此地找灵感，在Baron Hotel 203号房埋头写《东方快车谋杀案》（Murder on the Orient Express），几许文人墨客、风流雅士济济一堂，真系人杰地灵呀，曾经。叙利亚在二次大战后独立，阿勒颇变身为工业城市，虽及不上昔日风光，但在政府大力发展当地经济和古迹旅游下，无穿无烂算系咁，人口230万，全国最高。

中东政局复杂到一个点，简单咗好多嚟讲，主要系逊尼同什叶两大伊斯兰教派之争。逊尼占全球近九成穆斯林，即系约15亿人，什叶占余下一成，也有1.5亿人，唔同国家两者比例会有好大分别。叙利亚嘅问题系，由人口占少数嘅什叶派，管治占多数的逊尼派，不满同反对声音自然好似花猫咁“老是常出现”。

逃避不了的战火

2000年前由艾萨德掌权年代，以恐怖手段管治，1982年曾以血腥大屠杀镇压反对派，仲自吹自擂尸体多到放火烧几日都烧唔完。佢死咗之后，细仔巴沙尔上台。呢位在英国受教育嘅眼科医生，斯斯文文，讲嘢阴声细气，当时大家都几期待叙利亚会变天。巴沙尔注重经济发展，叙利亚总算过咗十零年平稳日子，点知2011年一遇上反对派抗争，官仔骨骨嘅佢立即变脸，地堡炸弹、生化武器样样出齐，连阿勒颇也遭殃。当然，ISIS等恐怖组织渗入反对派武装分子之中，致命杀人武器来自哪边真系天知地知我唔知，但夹在中间被当成靶咁射嘅平民真系无辜辜拮屁股。

♫ ♩ “都是你的错　潇洒也是错”♪​♬

呢单嘢搞到失控，有一个人最大责任。诺贝尔“和平”奖得主奥巴马当时大大声话要推翻巴沙尔，点知讲来讲去得把口，迟迟唔出兵，之后改口话打击ISIS算数，阿勒颇班平民真系多得你唔少（以美国利益出发，唔出兵其实都无错，那是后话）。见美国忍手，阿富汗战争后失去中东话语权嘅俄罗斯，2013年把握机会出兵撑巴沙尔，阿勒颇今日惨况同俄国空袭同武器有直接关系，不过边有人够胆同普京讲叫佢撤先？

不过讲来讲去，其实最想讲嘅系，阿勒颇，曾经同香港一样繁荣安定，一场无情的战争改变一切。香港依家好似风平浪静，但你永远唔知下一刻会发生咩事。所以，世界大事真系要知多啲，知得深入啲，得闲幻想下有咩方法拯救阿勒颇，你真系唔知几时会遇到个在联合国难民组织工作嘅靓仔靓女㗎嘛哎。