【台庆．多图】女星衣著成2018新娘指标　沈卓盈拣衫真系有一手

每年11月19日，TVB台庆嘅大日子，无论你睇唔睇电视其实都息息相关，特别系呢个星期结婚嘅新人，点解？因为全台上下女艺人都要出席台庆，个个都要著到靓一靓去贺寿。比著系你明知要够抢镜又只能著一次，唔通仲拎五位数买战衣咩，九成女星嘅靓衫，其实来自城中大大小小婚纱店赞助，又要洗又要改，呢个星期结婚嘅新娘子，睇嚟少咗好多靓衫拣啦。不过作为旁观者，好似下年结婚嘅准新娘就啱晒啦，可以一次过睇晒最新流行婚纱晚装款式，顺便可以望望年纪较大嘅女艺人晚装，帮妈妈装身呀吗。

闪爆系列

之前流行韩式婚纱晚装，好多都系以靓LACE作主打。不过潮流从来都系一个循环嚟嘅，今年台庆多位女星闪爆登场，首推沈大师沈卓盈。长袖露背银白色鱼尾长裙，尽显佢嘅修长身型，低胸V领设计，事业线无都变有，有就变得更长，加上手工钉上珠片拚作花纹，用嚟March in够晒抢眼，之但系鱼尾比较窄身，行嘅时候要小心为上呀。

闪爆嘅仲有冯盈盈以及蔡思贝，不约而同拣选金色珠片晚装，一个长袖一个tube dress，其实都系好大胆嘅选择，因为一不留神好易变成70年代登台一样。好在佢地都无多余佩饰，盈盈扎起头发加上钻戒耳环略缣成熟，而蔡思贝及肩微曲发显得青春活泼，颈链戒指通通唔戴，less is more，得分。

暗黑晚装

传统上老人家就唔多钟意，要著记得问过先呀。近年多咗新娘拣选深色系晚装，黑色显廋呀吗，多肉地至爱，不过并唔系全身都黑就得，要借助视觉效果先相得益彰。好似胡定欣呢件真系best choice，上身以黑色网装入膊挂颈，下身配以粉色散裙设计，整体效果非常甜美，大裙摆又唔怕行步路都就住就住，正呀﹗

担任主持嘅麦美恩其中一件晚装，系黑色裙加上金色珠片，够晒压场。另外两位妈妈级女星，吕慧仪以及陈自瑶都以深色晚装示人，Yoyo上身透视不失性感，吕慧仪嘅晚装前幅以深色珠片勾勒出S身型，拚以丝绒布料。两条裙都系直身返计，啱晒生产过后嘅妈妈，可以遮住盆骨扩大嘅缺点。至于对自己身型有信心嘅，就可以一试张秀文嘅黑色DEEP V露腿，不过都系𠮶句，黑麻麻都系问过老人家先好著

仙气晚装

除咗闪同黑，GFABLE嘅女仔好多会稳稳阵阵拣仙气款式，好似姚子羚嘅粉紫晚装，DEEP V得嚟好梦幻，唔会有过份暴露感觉；田蕊妮嘅飘逸透视袖口设计，成功为佢减龄兼增加仙气；菊梓乔嘅印花裙，以及单文柔嘅吊带蛋糕裙，都不失甜美感觉；刘佩玥嘅纯白色丁DEEP V长裙，简约而高贵，不过发型略为累赘，绑起应该会更为可人。

挑战性感极限

全晚最性感嘅，一定系邵珮诗，佢件战衣腰以下系粉红色绣花大裙摆，上身得一条布，绕过条颈遮住胸前重要部位，佢自己形容：“呢个look比较公主型，其实性感得嚟好elegant。”不过老老实实，如果婚礼著呢件晚装，恐怕老爷奶奶会黑面离场，准新娘当作反面教材好啦。