【TVB台庆50周年】农夫最好笑　陆永扮DO姐：好鬼低级㗎你几只嘢

19号晚嘅《万千星辉贺台庆》，两小时节目卖大堆头，晒冷式表演已经司空见惯，50位男艺人及50位女艺人唱歌跳舞，明显见到无一秒整齐兼咪咀，都唔知笑好定戥佢地攰好。演趣剧虽然都系旧瓶新酒，不过又居然成功抢FOCUS，唔系讲马国明被逼向BOB献出男男初吻，而系出镜一分几钟嘅陆永同C君，佢地扮演郑裕玲以及曾志伟，一出场已经令人忍俊不禁，拍案叫绝。

陆永著上白色套装裙，廋削身型加上曲发，俨如郑裕玲于《男亲女爱》中嘅造型，佢地一行出嚟就话要应征做司仪，不过陆永似乎好唔耐烦系咁话：“快啲啦好眼瞓呀﹗”坐喺场边嘅正牌郑裕玲俾佢地激到扎扎跳，陆永再以“你咁多部机我望边一边呀？”“好鬼低级架你几只嘢﹗”举手投足加上咀脸，真系比DO DO姐更似，DID DID 姐仲唔系你﹗

不过都不及只得一句台词嘅C君，戴住啡色帽著灰色马甲，加上高度都同曾志伟个月饼广告一模一样，C君仲以米奇老鼠声线讲一句：“打和﹗”，真系好想跟住讲句SUPER﹗咁大胆连奖门人都敢玩，企喺旁边嘅本尊当然动手打佢啦，不过观众就睇得相当过瘾啦。近年陆永C君多次同郑裕玲合作，DO DO嘅口头蝉以及小动作，佢地又点会唔知呀。养兵千日用在一朝，学埋学埋衬呢分几钟表演，成功FIGHT低台庆夜其他表演，成为网友至爱。