黄玉郎未婚妻ig闹人唔知丑　绯闻女友Rachel反击：有情绪病睇医生

黄玉郎7月向比佢年纪细30几年嘅女友Cass求婚成功，但67岁黄玉郎身边一直有个传过绯闻的林熹瞳（Rachel），Rachel更是黄玉郎工作上嘅伙伴，身为未婚妻嘅Cass于是醋意大发。Cass喺ig狂数Rachel，又暗指对方系“满口谎言的教徒”，Rachel终忍唔住留言反击，并称会考虑告佢诽谤。Rachel回应时指黄未婚妻屈得就屈，连佢家人都闹埋，或会告对方诽谤。

先讲下黄玉郎同Rachel关系先，黄玉郎曾经结过两次婚又离婚。6年前Rachel成立环球传奇影视娱乐有限公司，其后黄玉郎入股，而两人喺2012年被影到十指紧扣撑台脚，但咁多年嚟两人都否认绯闻，而因为大家都系公司股东，当然会经常见面啦！可能因为咁，Cass就唔多高兴。

而骂战起因系因为一张照片，Rachel电话回应《香港01》时从头讲起：“有次event黄生同佢未婚妻都有出席，佢哋同股东大合照，我就同以往一样影相同埋po上ig，我身为股东咁样做系好正常，但系佢（Cass）就喺ig乱咁闹。”Cass喺ig系咁写:“好明显……被对面偷拍了”，而hashtag咁样写“#借此利用别人淡化粉饰撇除曾经其关系的史实全世界都知道此地无银三百两是极其幼稚行径”、“#满口谎言的教徒”，即时辣㷫本身系基督徒嘅Rachel。

黄玉郎未婚妻Cass与林熹瞳ig对话内容：

Rachel喺Cass嘅ig留言发炮还击：“即系咁，我系呢个地方工作了六年，所有Job我一样会影股东相作record，试问我点解要为了一无品的小四去改变我的专业？……以前以为你是一个好女仔，原来只是一个妄自尊大、厚颜无耻喜欢含血喷人的人！……即使你是否真的会系他老婆，你不懂大方得体、继续搞事、再系咁恶毒乱紧骂人，一样全公司的人无人睇得起你同当你无到！……你个男人有头有面？要经的风风浪浪多到你唔信！你知唔知我们公司打紧仗？卖紧什么去集资？公司股东的名声最重要，你肆意破坏！就因为一张相！就算小女人都要用吓个脑啦！唔好害你𠮶个啦！有情绪病就真系去睇医生啦！”

Rachel似乎忍气吞声咗好耐，不断发炮：“以后我的工作活动，你都唔好出现啰！如果要出现，就唔该唔好发癫！我其实唔介意你存唔存在的，因为自从你显露你自己恶毒的本性，你在我世界只会是nothing！”、“你仲未同我同我姐姐say sorry！”

原来仲牵涉埋Rachel家姐，Rachel回应时解释：“有次活动邀请咗我家姐演唱，我家姐唔识佢（Cass），但佢喺ig话我家姐个人伪善，好凶恶咁走近佢，我家姐都唔认得佢点会凶恶咁走近佢吖？”而Rachel多次用小四嚟形容Cass，Rachel就话：“呢啲唔讲，佢自己知咩事。”

Rachel指Cass曾多次无理取闹，有次Cass喺ig又开hashtag：“#一个我俩多次合力都开唔返嘅A/C”、“#终于惊到出手再次私侵别人A/C取消晒自己原形毕露”、“#无尽谎言的伪人”、“#神除了听祷告亦是会终极审判人的神”指Rachel入侵佢ig帐户。Rachel则反击：“如果下次屋企停电，唔好屈我入侵你家电！如果你屋企停水，试吓用个脑谂吓是否洗水缸，唔好又发post乱骂人！同小女人真的好难沟通！在我眼中，你只是他其中一个女人，就算结婚都不是第一个！求婚了一星期都未结，已经系度搞风搞雨，自我澎胀，结咗婚仲得了！”闹到咁绝，Rachel回应时仍难掩气愤：“每日唔回应佢就老作屈我，乜都有行步路食个饭都屈，Block咗佢ig就话我入侵佢ig，点解我要发声？佢连我屋企人都闹，但冇名都算，但tag我真系忍唔到，已经十几日。”

Rachel称只系见过Cass两次，一句嘢都冇讲过，Cass见到佢时态度系点佢就唔方便讲，不过Rachel强调：“我同佢绝对唔系争风呷醋！我只系因为佢不停恶意嘅诽谤同中伤我至出声，我完全祝福佢哋开心快乐、幸福美满、连生贵子，你而家问我都系咁讲！我冇争风呷醋！但会保留告佢诽谤嘅权利！”佢话黄生已经代Cass向佢道歉，Rachel亦想息事宁人，暂且停战。至于Rachel现时嘅感情状况，佢就话：“我嘅工作排到2020，冇时间！”