【ViuTV】节目爆主题乐园灵异事件好惊惊　阿旦：有𠮶味嘢几刺激

主题乐园有鬼？幻觉嚟㗎啫吓我唔到嘅！但系呢啲鬼故出自主题乐园员工把口又真系几惊！星期四ViuTV节目《又要威又要戴头盔》请咗4位主题乐园员工做嘉宾，分享咗几个乐园入面嘅鬼故，但系佢哋分享嘅其实只系冰山一角，识睇要睇留言，原来仲有好多传闻㗎！妈呀，我买咗全年票仲去唔去好呀？

员工分享最恐怖系讲乐园里面黑妈妈个过山车，途中经过一个会转嘅星球，传闻有人见过一个小朋友坐咗喺上面，仲同旅客挥手，有唔少客人都话亲眼见过，万圣节期间有客人向员工讲：“点解将啲布景接到咁逼真，吓死我喇！”又有传闻话负责维修嘅人兄听到顶处有妹妹哼《快乐颂》，《快乐颂》点唱？自己google下。

另一个都系发生喺好受欢迎嘅游乐设施，就系坐住车仔玩嘅射击游戏，员工话呢个游戏每卡车只可以坐两个人，但相传有一对情侣玩玩下多咗个小朋友，但只得出口员工睇到，个小朋友仲做出“嘘”的手势示意员工唔好出声，更讲咗句：“我都只系想玩下啫，你唔出声咪得啰！”该员工吓到呆咗唔敢出声，两个入三个出，真系好惊呀。另外有个以狮子为题材嘅真人表演骚，每逢发现最上层有黑影出现的话，个骚就会坏机，表演被逼停止。

唔好以为新起嘅设施就冇事，员工提到一个以博物馆为主题嘅游览设施都有恐怖经历，事件发生喺某晚乐园关门后，客人都离开了，而负责拉闸的店铺职员将闸拉到一半的时候，听到一班小朋友冲过来的哈哈声，佢就停止拉闸，但等咗阵唔见有人以为自己听错，点知继续落闸时又再听见嘈吵声，于是佢透过闸缝望入去，就见到一班小朋友一字排开，但系全部只得一只脚。

好惊？仲未完呀！森林主题区有大树屋，平时客人上树顶参观都会经过一只假豹，假豹身上设有感应器，有人经过便会吼叫；有次乐园关门后一位维修人员上去检查，感应器正常，但当佢离开嘅时候，突然听到只豹吼叫，佢回头望，见到一名红衣女子喺桥对岸望住佢，哗好恐怖呀！后来呢位维修人员辞咗职。

4个传闻都发生喺唔同嘅游乐设施，咁我哋避开呢几个设施咪唔惊啰！你又错喇！节目播出后，有网友喺ViuTV网页留言表示喺乐园有怪异经历，最邪系坐船欣赏世界各地风俗嘅游乐设施，有人发现有公仔一直望实佢，直到只船驶到另一区仍然望住佢。又有疑似员工指上节目嘅都只系新员工，好多经典怪事都未知，例如门口水池凌晨发生过怪事，连酒店、canteen、office都有鬼故。唔通乐园真系咁猛？分分钟刺激过隔离乐园个万圣节㖞！

ViuTV嘅阿旦邓洢玲都好钟意去呢个主题乐园，连美国最大𠮶个乐园都去过，佢话睇完节目都觉得惊，但越惊越想玩㖞：“有𠮶味嘢都几刺激吖！乐园入面有啲恐怖游戏，玩玩下见到鬼咪更加逼真，又唔知系真嘢！”阿旦仲话：“其实边度都有鬼㗎啦！有啲生前可能冇钱去玩，死后唔使钱吖嘛，去流连下都唔出奇。”