郑中基演唱会｜身兼主办压力大到无觉好瞓　感谢古天乐畀面做嘉宾

郑中基（Ronald）一连6场《Fragments of Wonder 郑中基世界巡回演唱会2024》尾场请嚟古天乐咁做嘉宾，Ronald表示二人因《家有囍事》而认识 ，但成为好朋友嘅原因，原来系郑中基不停讲嘢令对方发笑，之后古天乐反客为主请埋嚟睇骚嘅梁咏琪、ERROR 193同肥仔、胡子彤、Locker上台，齐齐研究点先可以开骚赚钱，最后再一齐唱《男朋友》。

完骚后，Ronald接受访问时透露因为身兼主办，要兼顾嘅嘢太多，所以搞到无晚瞓得安乐，但幸好顺利完骚。提到开骚前确诊，Ronald亦谓十分担心：“中完得返三个星期，即系我得返两星期band彩排，体力、声音都系好紧张，但又唔系太惊要延期。”由于马上又要排台湾演唱会，所以Ronald仍要维持目前嘅133磅体重同30吋腰。

Ronald又大赞古天乐畀足面讲超多说话，但不敢叫对方唱《今期流行》，因怕自己要跳舞。“今次所有嘉宾都系我亲自打电话，除咗AK，佢托朋友同我讲，想做嘉宾兼唱《缘份无边界》；古生就一定系压轴，唔知佢会叫人上台，今日彩排我净系叫佢唔使担心‘我会由头陪你唱到尾’，但头先佢哋踎晒喺度，好似坐监放风咁。 ”

而提到完骚后签名环节，Ronald解释是因为见到前排歌迷被夹到头贴栏杆，眼见作出劝告无效，于是决定取消签名环节。“我有问过有无人受伤，好在无。我出声明之后整group人都好开心，佢哋要签名随时都可以啦。”