Twins演唱会｜阿Sa千字文分享感受：𠮶种最纯粹嘅快乐全部返晒嚟

TWINS在香港红馆举行的14场《TWINS SPIRIT SINCE 2001 LIVE IN HONG KONG》，获外界好评。虽然日前（6日）已圆满落幕，但网上热潮未减，不少入场睇骚的观众和粉丝仍在社交平台“洗版式”分享和回味演唱会的精彩和感人瞬间。而主角之一的蔡卓妍（阿Sa），经过两日休息后，今日（8日）亦于社交平台发千字文分享感受。

阿Sa对于能完成14场演唱会，心情仍然激动，她表示：“今日嘅我虽然个身体已经放紧假，但个心依然挂住演唱会嘅日子，14场呀！系14场呀！我哋完成咗一连14场嘅演唱会，唔单止打破咗我哋嘅纪录，仲做到以前觉得系无可能嘅事，而且圆满完成喇！好叻呀我地！！！”

阿Sa今次在个唱上大骚Fit爆身型，事前花了不少功夫，她续言：“呢段时间极度严谨又规律嘅生活，运动训练彩排演出已经变成我生活嘅一部份。我仲记得，第一日当我企喺红馆个舞台上面，望住阿娇、望住每一位观众，我𠮶种最纯粹嘅快乐全部返晒嚟。好多好多画面，好似走马灯咁系我脑海闪过，时间好似返番去以前嘅咁样。”

阿Sa也说到一对组合能走过22年，并不容易：“22年真系唔容易，我哋两个一齐经历过大大小小嘅高低起伏，面对过无数次难关，经历咗不同嘅人生阶段，出道嘅时候又点会谂到可以走到咁耐。”

阿Sa非常感激大家一路走来的支持，她感触说：“每一晚见到好多观众嘅面孔都好熟悉，有一啲系由我地出道就跟到而家嘅，有一啲系喺好多活动见过又好耐冇见嘅，有啲系佢哋好细个嘅时候见过，到而家有自己嘅家庭带埋成家人嚟睇演唱会嘅粉丝，𠮶种感觉就好似喺条街度撞番个小学同学咁，未必成日会联络，未必成日会见面，但一见到就好亲切，想互道一句你好吗？大部分嘅粉丝都已经走出校园，踏入社会，开始发现呢个世界并唔系你想像咁容易，要学习去面对同埋接受好多以前未见识过嘅人和事，要学会面对生活同工作中嘅压力，又或者要承担起为人父母嘅责任。”

“我哋开呢个演唱会就系希望，大家无论身分点样转换，入到嚟睇呢个show嘅所有人，都会记返起自己心底最纯粹嘅快乐，𠮶个最简单嘅自己，暂时抛开生活中嘅烦恼，同一班相同频道嘅人，去一次盛大嘅party，嚟一场青春嘅约定，感恩以前嘅自己，睇完之后又可以充满力量、精神满满咁投入生活同工作。”

阿Sa透露在做今次演唱会前，也曾担心过和好大压力：“而今次嘅演唱会，对我自己嚟讲都好似入咗一个加油站咁。老实讲做呢个演唱会之前我好担心、好大压力，因为体力都唔系以前细个咁，仲要连开14场系以前无做过嘅事，加上声带伤咗几年，一直都揾紧唔同嘅方法去恢复，针灸、食药、中医、西医、气功，练唔同嘅发声位等等，可以谂到嘅任何方法都有试过，抱著豁出去嘅心态尽自己最大能力去做呢一次演出，但真正开始咗之后，𠮶种被大家激发出嚟嘅热情同埋能量令我克服咗自己嘅心理恐惧。我依然系咁钟意舞台、咁钟意唱歌、咁钟意表演，𠮶一份初心依然炽热、𠮶种最纯粹嘅快乐原来一直都在。以前好多觉得过唔到或者觉得个天都要跌落嚟，好灰好难过嘅时刻，此时此刻一切都云淡风轻。回头望返好似以前嘅难关都唔系啲咩大件事，反而仲想多谢呢啲所有好或者唔好嘅经历，成就到如今嘅自己。”

最后，阿Sa鼓励大家：“人越长大，就越要记得向前看向前行。今次我又叉满电喇，我会继续向前，你哋都系呀！下次再见我哋大家都会系更好嘅自己！多谢大家。”