今日睇真啲｜袁洁仪任主持追访天后累亚视遭封杀：人哋系大明星

袁洁仪今日（24/1）现身观塘出席无线新剧《状王之王》宣传活动。提到早前接受港台节目大爆任亚视皇牌节目《今日睇真啲》外景主持时，因追访天后王菲导致亚视遭封杀。袁洁仪接受《香港01》重提旧时都得啖笑：“你哋都知，人哋系大明星，大歌手，点会冇记者追埋身。当时现场系有好多传媒喺度，而佢又一路行，变咗我哋嘅职责就系一路追，就一路问，就算佢唔答我都一样要照问。”

袁洁仪续说：“当时人多比较乱，唔知系咪我比较高啲，加上人多挤拥嘅情况之下，唔知系咪人撞到我，然后我个咪撞到佢，但我想讲，连我自己都唔知有冇撞过佢。（事后收到对方来电投诉？）系啲同事话返畀我知，话佢以后都唔做亚视访问。𠮶阵时冇咁方便，如果𠮶阵时有网络，我谂佢已经即刻喺网上面爆晒出嚟。（𠮶次之后，出去采访有冇阴影？）系会惊咗，变咗见到人多嘅时候，就要扎住个马，避免被人撞到我，我又撞到访问紧嘅人，累我又孭镬。（事后有冇想同对方道歉及解释？）其实之后撞唔返，都有谂住透过佢助手及佢公司同事同佢讲声，但就无缘份，到而家都未见过。”