Twins演唱会评论｜《喜剧之王》做唔到嘅事　竟然俾我入场触碰到

Twins演唱会开骚，好多人上网都话佢哋唱功冇乜大进步。

明白嘅，作为一个歌手，唱歌有水准系基本条件，唔走音唔咪嘴唔甩beat，系一个歌手应有嘅能力，尤其而家接触音乐嘅渠道愈来愈多，当年听到嘅Twins即使唱功麻麻，大家都可以好陶醉，但放喺今日咁多比较之下，自然会失色唔少。

或者换个角度谂谂，其实一直以嚟，Twins都明显系行偶像路线，好少见人用“歌手”称呼佢哋。不过，佢哋虽然系行偶像路线，但歌真系好红，唔系几首红，系讲紧十几首都红。或者因为咁，唔少人都觉得佢哋唱歌会有返咁上下，其实Twins嘅唱功冇乜大变，当年同而家一样，不过未必去到人人认同嘅水平。

老土讲一句，换个角度你入场唔系听Twins骚唱功，你只系听返一个回忆。你又会话，要听回忆我喺屋企都听到喇？除非你屋企可以住到一万人，一万人合唱一首《朋友的爱》，我谂你喺屋企应该听唔到喇啩？的确系震撼，尤其听到全场都识得唱，甚至入beat仲准过台上嘅表演者，你就知道呢一堆歌陪住我哋渡过咗一段咩时间，系已经失去、冇得返转头嘅青春。

《喜剧之王》入面，男人为买青春，不惜大洒金钱，依然求不得。系，青春你唔可能用钱去买得返，或者过多几十年有时光机𠮶阵，钱可以令你买返青春。而家冇咁可以点？唯有间中触碰回忆的界线，希望从当中可以稍稍回味已不复在的岁月，令我即使生理上已经长大，但心灵上可以再次回归当初的青涩。由同学爱新鲜到当天喜欢过错的人，痛恨你这情人然后终于我哭了，朋友仔感情再天真仲可以一开心唱饮歌。

或者心入面，已经冇理到唱得好唔好听。