周吉佩6位数开音乐中心 爱妻帮手管理唔怕磨擦：我哋经常嗌交

周吉佩（吉吉）投资6位数字金额开的《好声音中心 Great Voice Center》今日（12/1）于观塘商业区新张开幕，圈中好友到场祝贺，场面热闹。吉吉接受《香港01》访问时表示：“其实开呢间中心，由我一讲过话做，我就即刻去睇好多个单位，最终就畀我揾到呢一度，系用咗3几个月就完成。当中嘅有啲装修隔音设备，我都有帮手装修。音响器材方面，我都系亲力亲为去揾，我一啲都唔马虎㗎。”

被问到太太在音乐中心会是甚么身份？吉吉笑言：“佢系老板，但都要做，佢负责管理行政上面嘅嘢，例如上堂嘅时间安排等等，佢好多嘢做。（有咩奖励吓佢？）唔讲啦，暂时唔奖住，畀咗目标自己先奖啦。不过佢而家都好投入咁去做生意，因为佢系比较危机感重嘅人嚟，佢会担心做得唔好。相对我就钟意冲，好多嘢唔理，例如见到个音响器材，我钟意我就会买。但佢就会话睇定啲㖞，所以佢就系负责财务部嘅。（担唔担心两公婆一齐做生意会有好多磨擦？）担唔担心？其实都嗌㗎啦，因为我哋经常嗌交，大家都相处咗咁多年，大家都系为咗件事而去倾啫，所以大家都明嘅。（咁几好㖞，可以加深了解！）唔使啦，大家都好深啦，唔好再加深，再加深又会闹交，哈哈！”