独家｜李龙基澄清冇将七层物业转名未婚妻 Chris：从未谂过悔婚
今年73岁的李龙基（基哥），自从公开认爱比自己小36年的未婚妻王青霞（Chris）后，引起外界不少评论及关注。由于两人年纪差距大，很多不知内情的人对这对“爷孙恋”不睇好，甚至称基哥作“提款基”，认为Chris一心骗他钱，说基哥迟早人财两空。
原本二人未有打算特别回应种种传闻，但早前Chris搭小巴时竟然当众遇袭，浑身瘀痕，对方大声喝骂她：“贱人！呕返基哥𠮶七层楼出嚟！”由于事态严重，为人身安全著想，基哥与Chris决定透过《香港01》独家专访澄清5点失实传闻，基哥说：“我从来冇讲过话我将七层楼俾咗佢。”并还原事件真相。
场地：鹅颈桥四季火锅
摄影、摄录：潘乐文、麦超亿
剪接：潘乐文、叶思雅
Chris当街遇袭 被喝骂“呕返七层楼出嚟”
基哥与Chris的恋情曝光以来，因年纪差距而负面新闻不断，甚至有YouTuber及网站捏造假消息攻击二人，原本两人以为只是键盘战士随便说说，将他们当成“流量密码”。不过最近却有一名疑是基哥的拥护者，因误信“基哥将七层物业过户Chris”的消息而当街袭击Chris，基哥说：“真系会有人推到佢仆喺度，仲大声话：‘贱人！唔好呃李龙基呀！呕返七层楼畀佢！’”Chris重述案发经过，指自己坐小巴时，有一名外表粗犷的男士，趁她下车时一脚踩在她小腿、伸她向前，虽然当日天气冻，她身穿厚衫，但亦跌到周身伤，包括：脸部、膊头、腰、脚等都是瘀痕。
由于对方讲出“贱人，呕返七层楼出嚟，唔好再呃李龙基。”所以他肯定不是“点错相”，而是存心冲著Chris而来，可惜对方马上趁乱逃逸，令她难以追究，“我跌嘅时候趴低咗，跟住有人扶我，但系后边已经大家都落车，唔系好留意到系咩人。呢个真系刑事罪行，但佢啱啱好拣正𠮶个位，落车嘅地方系个公园，个车对住嘅位置就系坐乘客嘅位置，唔系落车口。佢净系用只脚撑我，𠮶个人走甩都唔知边个。（因为架车开走咗？）架车停咗，有人扶我，我跌低肯定好多人围住，所以冇仇报，唔知边个。”事件令Chris蒙上心理阴影，现时基哥不准她单独出街，即使出街都必须搭的士，尽量在人多的地方活动。
请按下图睇更多Chris遇袭后伤势：
基哥从未将七层楼转名Chris 揭业权现有主人
有见及此，基哥必须澄清五点，第一就是他未有将物业业权转让Chris，他说：“我而家好老实咁讲，我从来冇讲过话我将七层楼畀咗佢，我从来冇讲过，系佢哋唔知喺边度收到风返嚟。”他强调Chris冇呃自己钱，斩钉截铁表示自己从过往任何访问中肯定冇提过以上内容，跟胡说的人表示：“作到咁大冇意思”，并还原事实真相，基哥说：“我事实系以前买咗好多楼，但系因为我要同佢喺埋一齐，我同我前妻离婚，我将所有嘢俾晒佢（前妻），所有楼、车位，全部过户，可能有呢啲小小嘅渊源出咗嚟，啲人以为佢收咗七层楼。但系我亦都费事去澄清，佢同我唔介意咪得啰，但系最近发生呢件事，我觉得真系有必要澄清一下。若然再系咁落去，分分钟有啲比较激烈嘅粉丝，唔知会做乜嘢，所以我一定要讲清楚。”
此外，他谈到Chris家境不俗，家族在佛山有间大工厂，并提到：“佢父亲有一段时间好反对我哋，直情同佢讲，你返嚟啦，我畀返几个股份你，买架$100万嘅Tesla畀你，你返嚟啦，离开佢，但佢都不为所动。到而家到佢屋企完全接受我哋，好，既然你爱得咁深，由得你，咁点解需要呃我嘅钱？分分钟我呃佢嘅钱！佢自己有两层⋯⋯”Chris接著说：“我自己有物业。”包括一层1,800多呎，一层1,500多呎的单位。早前有人撞到二人搭巴士，拍照时裁走Chris，只影低基哥再放上网，说他被骗光家财、晚境凄凉要搭巴士，基哥得啖笑：“我唔觉得我系咩特别嘅人物，冇乜所谓，我都系一个打工仔，只不过我份工特别啲，同你份工唔同咁解，我搭巴士冇问题㖞。”更指自己也会搭小巴和地铁。
Chris身家丰厚 否认东莞坐台谣言
第二点，有人说Chris在东莞“坐台”做小姐，基哥就指Chris 10岁就去美国读书，“若然佢家境系咁困难，需要佢出嚟呃钱或者坐台嘅话，点解要送佢去美国？”而Chris也补充自己自小学琴、学画画、写书法，表示原生家庭条件相当优厚，更提供学费单、学揸飞机账单等证据（详见另稿），指自己单是学费都超过$40万美金，并说：“如果等阵畀张账单你睇，我读书要几多钱，正常你都好难处理，佢唱到呕都未必搞掂！”
基哥心痛Chris超强画功惨被屈成电脑作画
第三点，Chris画功了得，可说是“丹青妙手”，经常于IG晒画作及超强画功，又爱将画作送给圈中人，谭咏麟、罗家英、陈炜、罗兰、马国明、汤洛雯等圈中人都收过她的画作，而Chris亦曾透露每画一幅画约需三星期。不过，有人却“老屈”她用电脑作画，基哥心痛不已，“佢自己画，我都知，啲人就话画咩画啫？电脑扫描啫？哗！呢个诽谤好大！系唔系画嘅，一睇就知，佢自己未睇过，就话‘画咩啫？扫描啫。’我有啲心悒嘅感觉，我哋香港人点解仲有咁多质素咁低嘅人？”
Chris与基哥子孙相处融洽
第四点，有报道指Chris的子女向传媒控诉基哥被呃钱，基哥就强调，根本自己的仔女几乎从未在媒体曝光，遑论接受访问。他表示Chris与自己的子孙实质相处融洽，不时食饭见面，“我啲女间中都会Send message畀佢，话多谢你照顾我老窦。”不过另一边厢，Chris的双亲起初却不接受基哥，Chris不讳言：“你如果有个女，你用心栽培佢，相信你同我爸爸妈妈谂法一样。（佢当时点样阻止？）佢叫我改名换姓，话你搞到咁大镬。（佢唔钟意系因为年纪差？）佢哋好𤷪系……有啲亲戚朋友影返我同佢嘅新闻畀我屋企人睇，我嗌佢哋唔好睇。我改变唔到我家庭，但我嘅坚持佢哋又无可奈何，叫做我逼佢就范，但系都唔好搞到佢真系好难过咁啰。”随著时间，Chris家人就慢慢接受现实、自我消化。
Chris家有白事延期婚礼 从未想过悔婚
而第五点，基哥和Chris原定于23年年尾结婚，不过由于Chris家中有白事，不得不按照传统及家人意愿，把婚事延期，100天内不得办喜事，却被说成是“七层楼到手就悔婚”，她直指从未谂过悔婚，“网上写到我自己作咗个故仔出嚟，问我屋企系咪死咁多人啊？要搞到咁大镬，冇人会咒自己屋企人！尤其呢个系由细到大教我好多嘢嘅外公，我每一次讲都系好难过。”基哥有留意网上评论，他说：“一宣布咗话延迟，𠮶啲咩YouTuber话‘梗系啦，收咗七层楼，踢晒啲仔女出街，仲唔一脚伸你个老嘢走？’”他认为有这种想法的人都是“心地唔好”，“点解一睇见个消息出嚟，就觉得睇你几时衰，睇你几时死？”基哥又表示，其实自己与Chris 18年确立关系后曾想过闪婚，但他亦担心过自己会否被一时热恋期冲昏头脑，想再观望清楚，又遇著其后的社会事件、疫情等，才拖到现在，但一定会结婚。
基哥明白老夫少妻的确多人关注，身边朋友都有问起，但他觉得，质素高的人会问：“相处得好唔好啊？得唔得呀你哋？”知道二人相处和谐，会说恭喜，并叫两人好好经营。相反地，质素低的人则会说：“‘佢呃佢钱㗎啫，咁老佢都吼？肯定呃佢钱啫！呢个老嘢临老入花丛，见到后生女梗系嗒佢啦！’呢啲就质素低，佢永远唔会感觉到真系有啲真嘅爱情，佢唔会相信。”而讲到婚期延到何时，两人尚未定好，稍后会去美国筹备，但不打算铺张大搞及公开婚期，Chris谓：“第一我哋真系唔会请你饮，唔需要你畀人情，我哋自己OK就OK，我哋只系签纸。”基哥续道：“想畀返个名佢，等佢同屋企人交代，我唔系玩你个女，我系好认真咁做你女婿，希望外父第日将家产交返畀你女婿，哈哈。”
Chris无惧被称“大陆妹”及标签 自豪中国人身份
基哥曾在其他访问提到，女友来自国内，令外界对她有定型或标签，Chris则以中国人身份感到自豪，无惧被称“大陆妹”，她说：“你哋形容我大陆妹唔紧要，因为其实全中国都系处于一个大陆里边，你嘅祖辈都系来自大陆，大陆系我哋祖国。”她自豪自己与基哥都同样爱国，又表示：“冇人会希望自己国家唔好，当你自己国家好，你去到边度都会觉得有面子。”、“我觉得可以成为一个中国人系非常之自豪，因为我哋可以承传五千年华夏嘅历史。”