肥妈李鼎打大佬｜游嘉欣唔识死打烂沙盘问到笃：好彩冇畀佢哋闹

由肥妈、李家鼎（鼎爷）及游嘉欣主持的无线烹饪节目《肥妈李鼎打大佬》，今日（29/12）于将军澳电视城举行记者会。游嘉欣承接上一辑气势，继续化身成问题少女，在节目中就各样问题向肥妈和李家鼎“打烂沙盘问到笃”，她说：“今次再度同鼎爷、肥妈合作感觉好唔同，因为经过上次嘅深化合作，大家熟络咗，变咗好多嘢我都好够胆去同佢哋互相交手。 就好似上一辑有好多嘢我都系收埋喺心度，唔敢去问，但今次我就够胆去问出嚟。不过好彩冇畀佢哋闹，反而大家就会就件事一齐去讨论，虽然大家会有自己嘅睇法同意见，但出到嚟嘅效果又几搞笑。讲真喺佢哋身上真系可以长知识，无论喺饮食上，同做人都学咗好多嘢。”