【兰花刼】惊现劲多熟面口失踪甘草　牛头角顺嫂十年冇见好怀念

网民月头狂轰的“伪”高清10年出土剧《兰花刼》话咁快去到最后直路，今个星期日就大结局，并由王晶监制的《赌城群英会》接棒。姑勿论大家开心，还是极度唔舍得都好。都想问大家一个问题，当你睇返10年前嘅剧，有冇一种感觉：“点解有啲人熟口熟面，但又好似好耐冇见佢嘅？仲要讲唔出个名。”俗语有云：“十年人事几番新。”一线小生姐仔都变晒90后，旧嘅演员大多都各奔前程，想当年大家见惯嘅绿叶，而家有啲都淡出娱乐圈。今次就为大家介绍好几个在《兰花刼》出现的“失踪人口”，重新呼唤他们的名字。

梁葆贞

首屈一指梗系要讲起“牛头角顺嫂”，大家对佢把声、做嘅传统妇孺角色，都有极度深刻印象！认真，《兰花刼》确实是她在TVB最后一套作品。现年81岁的她，已经长居加拿大，得闲才回来香港。早前她有出席过公开场合，表示连TVB都不清楚她几时回港，所以好难夹到期拍剧，加上她在加拿大生活悠闲，退得休自然没有太大意欲工作，所以大家咁耐冇见佢，都会觉得：“乜顺嫂出返黎？”但其实睇埋呢套就冇喇

陈嘉仪

在剧中饰演罗乐林老婆的嘉仪姐，又系好耐都冇见过佢！原来她是TVB第一期训练班出身的艺员，于90年代曾一度息影，2000年代再回巢拍剧。2007年，除了拍《兰花刼》之外，当年还是多产之年，拍过多套大剧。不过此后又开始减产，直到2013年拍埋《凤舞香罗》就冇再喺TVB见过佢。唔经唔觉，陈嘉仪已经登七喇！

江汉

江汉叔又系一个印象好深的艺员，一望就觉得好面善。想当年他60年代初入行，就已经是电影界的当家小生。后来加入电视界，做开正气、霸气、有型的成功人士角色，大家都公认佢为实力派绿叶！去到2011年开始减产，直到2012年《回到三国》里客串过一集之后，就淡出娱乐圈。《兰花刼》算系江汉叔的沧海遗珠。

黎宣

讲起宣姨，就会知道佢当年系TVB的“御用妈妈”。除了长篇处境剧《真情》之外，最为人熟悉、最经典就是1992年《大时代》做丁蟹妈妈“贱婆婆”，闹到丁蟹闹到入心入肺。自从2008年拍完《Only You只有您》就息影后，《兰花刼》出土就成为了回顾宣姨演技的节目。现年85岁的她，就当然要同老公恩爱到老喇，经常见到佢哋出街拍拖，劲sweet。

郭德信

如果当年有“御用乜乜乜”的话，郭德信与陈鸿烈都是“御用老板”的不二之选。64岁的他，曾是TVB著名绿叶，做忠又得、奸又得，得咗！由于他外型就渗透了几分高贵味道，所以做来做去都是富贵人家。而他最后在TVB的作品就是2011年《天与地》客串过下做神父，就系咁，6年来都冇新作品。