林超荣病逝｜陈淑兰喊住主持　读出三位女儿亲笔信透露最后遗愿

香港电影著名编剧及演员林超荣（超人）昨日（12日）病逝，终年61岁。一起主持港台节目《开心日报》的好友陈淑兰（兰子）亦有到医院送他最后一程，今日节目播出《怀念林超荣特辑》，兰子、杜雯惠、黄桂林、谭永标等轮流讲出对超人的感受，兰子喊住主持说：“我知道超人系同我哋一齐，佢嘅正能量嘅人同我哋一齐。”

而谭永标亦泣不成声，饮泣表示自己后悔从未告诉林超荣自己何其欣赏他，甚至视他为偶像。黄桂林又透露，这天早上特地买了超人最爱的多士、鸡蛋，放在他平时最爱坐的位置。节目上除了播出他最后一次参与广播剧的片段，亦播放多首超人喜爱的歌曲，如李宗盛《寂寞难耐》，以及她三个爱女特地点名要送给爸爸的《一生所爱》（原唱：卢冠廷）。

节目尾声，兰子强忍眼泪读出超人三个女儿撰写的亲笔信，当中除了提到林超荣与她们相处的点滴，如爱讲粗口、雨中救猫、唔刷牙返工、临终前的对话等等外，女儿亦透露原来林超荣的遗愿是做区议员。

以下为林超荣女儿亲笔信全文：

“超人爸爸嘅传奇人生昨日煞青咗，我好钟意亦好唔舍得呢个唔梳头、得返四只牙、拎住个穿窿纸袋，入面袋住三本书，仲系过期未交罚款，同埋将粗口发挥得淋漓尽致嘅爸爸。爸爸，个个嚟探你嘅朋友都话你真系好好，又搞笑，又遴鬼迍，但系乜人都帮。讲到帮人，爸爸都有“有志不得伸”嘅时候。

讲个秘密畀大家听，爸爸其实一直都想做区议员，除咗可以帮人之外，仲有个天大契机，就系可以喺𠮶区周街免费泊车。喺《开心日报》报道主持离世咁伤心嘅消息， 成件事好有爸爸嘅作风，你乜都睇得咁乐观。爸爸冇嘢做唔成，唯独系做唔到嚿电芯，爸爸只有正极，冇心机，正能量爆满，爸爸系所有人心中嘅开心果。好挂住𠮶个10:30电台开工，10点先电话响，再听多一句“哎呀！”然后牙都唔刷就冲去返工嘅爸爸，我问你，个口咁臭畀人闻到㗎㖞，你话是但啦，啲听众都闻唔到嘅。冇错，爸爸真系好污糟，不过帮佢澄清返，爸爸一日冲两三次凉，一日洗廿几套衫，只不过都系得一条底裤。爸爸，你咁钟意讲嘢，喺另一个世界记得开返场栋笃笑任你噏，到时开再间书店同文具店，到时大把笔俾你偷，冇人再话你用钢漏墨漏到只手变黑色喇。爸爸生前真系好钟意笔，见笔就攞，前日已经得到朋友马小强证实，爸爸确实有‘恋笔癖’，爸爸对笔嘅喜爱程度，大至动作全伊利沙伯医疗团队为已经住院嘅爸爸喺旧病房找寻失物铅笔一支，当中具有夸大成份，请自行斟酌。

爸爸，你喺滂沱大雨中都不忘拯救一窦BB猫，唔知系咪因为佢哋喺你书店大，成日𥄫你做紧啲乜嘢，而家又俾我哋叫做肥仔，又系只污糟猫。一切嚟得太急啦，最后一句听爸爸你讲嘅竟然系‘哗！梅菜剁猪肉，正呀！’边有人做化疗都咁有胃口㗎？爸爸，你真系好努力、好叻、好犀利，我哋永远爱你，你永远都喺我哋身边。虽然WhatsApp group嘅讯息以后唔会再全员已读All seen，但系你你对我哋嘅好，对我哋嘅付出，你一生人做过嘅好事，我哋所有人Well received，收到晒，再见啦爸爸。”