王喜寸爆马浚伟向记者夸大演唱会时病情　句句有骨：一睇就知大话

马浚伟早前开完六场《幸福 · 春夏秋冬》Ma’s Ter Mic演唱会，并自爆开完头三场后身体不适，食药后更过敏至舌头出血等症状，王喜看完有关报道后，就拍片质疑马浚伟连讲5个大话，句句有骨，更问：“有啲成年人讲到啲三岁细路仔都唔信嘅故仔嘅。”

王喜近日以“如果我系马浚伟经理人”为题拍片，他先读出一篇有关马浚伟演唱会的报道，内容指马浚伟自爆开完头三场演唱会后，因著凉导致声带发炎，服食消炎药后没想过竟造成严重过敏反应，嘴巴、气管、喉咙流脓、肿胀，黏膜裂开，需要漏夜入院打针，但第四场（17日）演出当晚病情最为严重，舌头肿胀至流血，马浚伟因不想观众失望，仍然坚持如期演出，台下有工作人员随时候命帮他止血。

王喜以单打口吻说：“出现咗状况㖞，争啲冇命呀，哎呀！担心死我喇！”寸马浚伟向传媒自爆不舒服，并谓：“自爆即系唔系人哋嚟问你啦？即系吸引唔到人哋嚟问你啦，又或者冇人关心，又或者冇嘢值得人关心啦，于是乎先系自爆。”不满报道中所用的“无预警过敏”字眼：“喺无预警情况下造成过敏反应，争啲令佢冇命呀，乜有啲过敏会预先发个Message或者E-mail畀你，话我准备有过敏反应㗎喇啵，你Ready㖞，你Ready未呀？咁我先至开始过敏畀你睇，无预警㖞，啲中文真系好好。”

王喜指出，若报道是完整覆述马浚伟所讲，而非传媒无中生有，他觉得是马浚伟讲大话，直斥：“一睇已经知系大话啦！当睇嘅人唔知佢讲紧大话，当睇嘅人会信㖞？”王喜认为他讲自己是因温差著凉，但11月中的天气温差再大，相信都不及平时出入冷气地方般大，调侃：“平时身体行出行入啲地方又唔见你发炎嘅？开演唱会就会声带发炎嘅？”

而第二个大话，他认为是食消炎药后反而令病情恶化，王喜指若事情属实，马浚伟应立即开记者会、公开涉事药物，他说：“食消炎药反而令炎症咁剧烈反应㖞，到嘴巴、气管、喉咙肿胀到全部黏膜裂开㖞，如果有一只自称消炎药嘅药物，队咗之后会有咁嘅反应，呢啲唔系叫过敏反应，系叫毒理反应。如果有种消炎药系会讲到有马生呢种咁嘅反应嘅话，咁系咪应该第一时间同消委会讲呀？系咪第一时间开记者会呀？系咪要为咗公众利益，你要拎𠮶只药出嚟畀大家睇呀？个名点串法呀？边个医生开畀你呀？就算你自己买，边间药房会出售呢款会导致所谓过敏反应咁剧烈嘅消炎药呢？你觉得你好特别咩？几百万人当中只有你一个有过敏反应咩？梗系唔系啦，你中得嘅话，阿茂阿寿、甲乙丙丁都会中㗎嘛，你点可以自视咁高㗎？觉得你先系天选之人……”

接著他再数第三、四个大话，指马浚伟自称要入院打针消肿，却没人影到他出入医院，质问：“竟然冇人影佢出院𠮶张相？冇人影都揾你助手或者经理人影完放畀记者啦，哼。”而当马浚伟提到自己因不想歌迷失望或担心，坚持要唱完六场，王喜却说想不通为何歌迷要担心，如果有得退票或退款根本就不会失望。他继续咬住唔放，称若打完针消肿都冇用，还令病人要流住血唱歌，那他应该公布到底是哪支针药，并公布住哪间医院。

王喜又提出疑问，称若马浚伟不适到如此严重的地步，为何第四至六场的观众完全冇发现，“去听第四、第五、第六场嘅观众，系完全察觉唔到之前四日里面原来马浚伟徘徊喺死亡边缘㖞，而去到第五个大话就系，喺最严重嘅时候，工作人员喺台边Stand by帮佢止血，因为佢条脷会流血吖嘛，哗，条脷流血我想问有急救牌嘅每一位，条脷有血点止血呢？系咪应该攞喷雾胶布帮佢止血呢？”他续说：“原来有歌手可以嘴巴、喉咙肿胀到黏膜全部裂开嘅情况下，继续好敬业地完成佢演唱会，而台下冇任何观众听得出有问题？答案只有一个，谜底就系——咪嘴呀！哈哈哈，Otherwise，冇可能啰！条脷流血仲可以唱到如梦似醉？”最后，他呼吁若医生见到马浚伟求医都要小心，更谓：“有啲成年人讲到啲三岁细路仔都唔信嘅故仔嘅嘅。”等。

网民睇完片段都不禁问，到底王喜跟马浚伟有什么过节，怎么仿佛“好大仇口”。而两人除了同样曾为无线艺人外，亦分别与陈志云熟稔，几年前马浚伟开演唱会陈志云现身担任嘉宾；而王喜亦在当年陈志云上庭时陪伴在侧，陪他出入法庭、雪中送炭，两人近年关系仍然友好，会一起拍片。若王喜与马浚伟真有过节，未知志云大师能否化解呢？