莫可欣默认遭旧情敌陈淑兰怒掴　剖白感受：唔系咩特别嘅事无所谓

陈淑兰（兰子）近日现身伍仲衡与周国丰的直播节目，大谈她的感情生活、情绪病与自残经历、与张国荣、周星驰的合作点滴等等。曾与方中信拍拖的她，被观众问到是否曾掴过莫可欣一巴，她竟说：“唔止一巴！”

兰子与方中信有过一段旧情，当时有指是莫可欣介入二人感情，令兰子与方中信四年情断，更有传她曾怒掴莫可欣。直播中有观众重提此事，伍仲衡问：“有人话你掴过人一巴㖞，系咩事呢？”兰子直认不讳：“唔止一巴，讲完就算喇，但我至少答咗啦，系咪？”周国丰想知道详情，兰子就表示：“我好嬲系嬲个男人，嬲个男人呃我。”

今日，兰子掌掴事件中的主角莫可欣出席活动时，就被问到可有留意有关报道，她说：“其实我真系无留意，因为我当时我唔喺香港，但因为网上一㩒Facebook就弹出嚟，就见到点解有我个名嘅，咁我都留意到啰。( 咁你有无唔开心？) 无，因为首先咁多年前嘅嘢，系咪先，我谂大家都生活咗咁多年，好多嘢，唔系所有嘢你都会记得啦，又唔系咩特别嘅事，无所谓啦，点样讲都。开心就算啦，其实呢个世界有好多人都发生不幸嘅事，点都好，都好多年过咗喇，都唔想再讲喇。”回答得相当大方得体，也未有否认遭兰子怒掴。她又表示今年身边不少亲友都离世了，深感做人不要太执着，每一日都过得开心，对别人好一些已经很好。