黄祥兴同无线结束18年宾主关系　爆离巢真相：好难同人竞争

现年44岁的黄祥兴（前名黄长兴）2005年参加《香港先生选举》后便加入无线做旗下艺人，参与过不少剧集演出。可惜近年幕前演出大减，早前他在社交平台突然宣布离巢效力18年的无线，专心搞饮食业生意。

今日（25/11）黄祥兴现身长沙湾出席动物作品展览活动，就离巢接受《香港01》访问时表示：“其实我依家就好似一个孤儿咁，不过依家有好多唔同嘅平台，都会有唔同嘅机会，而将来我都有可能会返去TVB都唔定，因为将来嘅事冇人知。而暂时我呢个决定系舒服嘅，咁就试吓去尝试。”

被问到现在是否需要主动揾工作机会？黄祥兴表示：“坦白讲，呢个（工作机会）系多咗嘅，人哋有咩活动揾我，我都即刻应承会出席。相比以前我系冇咁活跃会出席，比较低调。所以而家我就要整返个靓样，Keep好个状态，等其他人都知道我仲喺度，未曾放弃过。希望透过出席活动啲人仲记得我，然后都会揾我做嘢。”

被问到是否因幕前演出减少，加上竞争太大，感到意兴阑珊决定离巢？黄祥兴表示：“当然系有好多后生仔，加上自己年纪唔细，同埋广东话又未去到好流利，咁所以呢啲我系知，咁唯有Keep住好自己个状态，同埋广东话能够再讲得清楚啲，唔好有懒音啦。而我都明白系有竞争，同埋要有下一代，亦明白自己咁嘅年纪都系好难同人竞争，同埋都知要做爸爸呢啲角色，但就唔希望咁快啰，如果你问我对无线仲有冇留恋？其实我系有留恋嘅。”