专访｜谭旻萱男友力满分 做Me&队长全因冇技能：唯一贡献系体能
近年香港女团当道，单是这两年间都出了至少5队，半个月前，寰亚突然无预警下宣布旗下的全新三人女团Me&正式出道，有“篮球女神”、拍吕爵安《E先生连环不幸事件》MV一夜成名的模特儿谭旻萱（Mandy），14岁唱《差一点我们会飞》爆红、18岁出碟的黄淑蔓（Feanna），以及曾到韩国做交换生的新面孔连家颖（Vian）。虽然出场仅半个月，但三位其实已秘密练兵两年，早前更曾到韩国集训3星期，三位接受访问时就透露集训期间的一次大争执，Mandy亦自爆做队长原因，正正只因自己冇嘢叻。
场地：西九文化区ADD+ 餐厅
服装：Tory Burch（Mandy）、 Ming Ma from Lane Crawford（Vian）
发型：Hillnex Lee（Feanna）、 Carr Cheng（Mandy）、Vic Lai（Vian）
化妆：Kineks Ho（Feanna）、Zoe Fan（Mandy）、Shuen Kong（Vian）
首次齐人见面系网上 气氛劲尴尬
Me&的组成先由Feanna开始，出道8年的她虽然年仅22岁，但早已是寰亚师姐，当公司决定搞女团，率先招揽的就是刚大学毕业的她，她好奇还有哪位队友，原来就是自己的“网友”Mandy，Feanna说：“有一日有个公司同事同我讲，公司签咗个女仔同你好似样呀，我问系边个嚟㗎，就Follow咗佢（Mandy）IG，觉得有Mandy都应该几好玩，咁做啦！一开始就得我哋两个Training，后尾就有Vian嘅加入。”讲到三位初次见面的情况，她们透露由于当时疫情当道，所以只能Zoom Meeting见面，气氛要用“尴尬”形容；而最后期加入的Vian都直言，两位师姐确实好似样：“第一次望佢侧面轮廓，我觉得系咪两姊妹嚟㗎，点解可以咁似样？”
Vian定位Me&为“女战神” 要Cute住咁型
乐坛女团愈来愈多，当中COLLAR、Lolly Talk人气叮当马头，讲到作为新人的Me&要如何突围，队长Mandy都有想过这个问题，虽然Me&默契好，但其实其他女团一样有默契、一样有自己特色、一样有感情，不过她觉得Vian曾用一个词形容三位的定位，是颇贴切的描述。Mandy说：“我觉得我哋虽然好粉红，但系我哋唔系Cute𠮶只，曾几何时Vian Bring out过一个词——‘女战神’！”Vian呆呆地说：“哦！𠮶个！”之后就表示：“我觉得我哋系好女仔，但系系揸住枪，一开枪系开个心畀你嘅𠮶种感觉。”Feanna再总结：“即系Cute住咁型！”
赴韩同居21日 Mandy担起Feanna男友角色
为了要装备自己，这三位女生除了秘密练兵两年，早前亦特地飞往韩国集训21天，录团歌《Eye to Eye》和练舞，更住在同一间民宿共同生活，虽然一日要地狱式特训12个钟，不过Feanna还抽到时间行街扫货，Mandy直言自己简直变了她的男朋友，“佢喺韩国日日都要Shopping，其实韩国呢间同𠮶间舖头都系一样，但佢又要行晒成条街，佢系一个女朋友嘅角色，我就系男朋友嘅角色，有次我一只手攞住冰糖葫芦，佢要买衫我又帮佢拎住一袋，又话想睇边间，总之我成日都要陪女朋友Shopping。”她更叫Feanna自己招供“麻烦女友”事迹，Feanna笑说：“有顶帽一顶白色，一顶啡色，佢就话白色𠮶顶好睇啲，但系我最后买咗啡色。（咁问嘅用意系咩？）我自己已经有答案，纯粹想问吓，佢support我，我会好开心，但系佢唔support我，我就会买自己想要𠮶只颜色。”
Feanna、Vian做家务 Mandy竟然系霸气保镳
虽然听落Feanna要“男朋友”凑，但其实她也有服务大家的时候，讲到三位要同居21天，Feanna就大爆两位队友生活能力有问题，她自己习惯日日洗衫，但两位跳舞出完成身汗都不洗衫，Madny立即抢白：“我哋两个都会洗衫！”Vian附和：“梗系啦，点会唔洗衫㗎？”Mandy解释，自己只是把衫收起，觉得需要洗的时候才清洗，Feanna因而担当起洗衫、折衫、晾衫和清洁的工作，但洗碗除外；而自认有强迫症的Vian则是收纳大师，咦？那Mandy呢？她解答：“保镳！”原来因为她们的民宿附近比较多醉汉，身高177厘米的她就要摆起霸气款、眼看四方留意住有冇危险，“边个人过嚟搞我两个女朋友我都要保护佢！”
Mandy自嘲做队长因为冇技能：唱歌跳舞都系零
Feanna更指Man爆的Mandy还是队中的体力担当，因为三位住的地方冇电梯，初到埗时Mandy竟以一己之力帮全队搬行李上二楼，“女朋友”Feanna说：“我搬咗一个喼，只手已经Chok亲，我话好痛呀我只手，可唔可以帮我一齐搬？”讲到是否因“男友力”爆灯令Mandy荣升Me&队长一职，她解释的原因却十分搞笑：“Feanna就唱歌担当，Vian就跳舞担当，我咩都唔识， 咩都零，唯有喺体力上贡献，呢个系我唯一可以做到。”Feanna补充：“佢系意志力担当！”不过虽然Mandy不懂唱歌跳舞，但当公司邀请她做女团时，她从未想过拒绝，其心态相当正面：“冇㖞，可能我系天蝎座，新嚟咪试吓啰，虽然我觉得吃力，咩都由零开始，但系我钟意玩，都系学返嚟嘅啫。”
Feanna练舞痛哭想放弃 内疚拖累队友
Mandy的意志力也激励了Feanna，因为她其实跟Mandy一样不懂得跳舞，最初以为自己会掌握到，但发现自己体力根本完全不及两位队友，相当灰心，“我完全系一个运动白痴，佢哋两个都系运动高手，佢哋嘅体能系癫，我哋每次上跳舞堂都有一个钟系做体能，Mandy可以做3分钟平板支撑，我30秒已经震紧同跌紧。有时老师比较严格，唔当我哋初学者，有时未够1分钟我已经跌咗落嚟，佢叫我重新做一次，但系唔系我自己做，佢哋要陪我，我好内疚，每次评分我都系最低，我体能又唔好，又唔够力，佢哋成日话我软癞癞，一开始喺跳舞方面有一个好大嘅压力，基本上每次跳完都会喊。”
Feanna扭计10分钟 终被队长一句话点醒
而她和Mandy曾在练舞时争执，有次她实在太难过气馁，结果却激嬲了Mandy，Feanna说：“我话我真系唔得喇，佢话你咩唔得啫，你得㗎！”Mandy：“因为由始至终我对所有人都系平等，我觉得你真系做到，当佢话佢自己做唔到，我就会好忟，做咩无啦啦放弃？做咩要放弃自己呀？”Feanna表示：“我又驳返佢，都话唔得咯，佢话唔系㗎，你得㗎，跟住我哋就反反复复，呢个对话大概10分钟，同一句嘢，同一个情绪。”但她很庆幸有Mandy和Vian陪自己，因为如果只有自己一个，体能和意志力欠奉的她相信早已放弃。早前的Me&纪录片中，曾揭示Mandy一日做十几个钟运动，跑楼梯、篮球、健身、跳舞冇停过，公司同事甚至觉得她似只牛，Mandy回应：“因为我净系得体能可以贡献。”
Mandy激励自己座右铭：自律换自由
不过Feanna就不同意，她透露曾因Mandy一句话被点醒和启发，大赞对方不纯粹只是贡献到体力：“我好欣赏佢哋乜都肯做，乜都唔理做咗先，有次Mandy入录音室，我话你唔惊嘅咩，唔好话你啦，我去韩国录音室我都惊呀，佢话唔识咪做啰，做错咗咪学啰，学完之后咪再做啰，呢一句系好Inspire啰！”Mandy坦言自己小时候已很易肥，需要做大量运动，但她的观念就是“自律换自由”，要自律才可以吃到想吃的东西，或争取时间做其他事情，“做运动意志力好紧要，因为我觉得，最辛苦嘅都做过啦，所以我先可以做到3分钟平板。”而Vian除了跳舞外，从中学起已是田径学界成员，经常举铁、身型很壮，甚至连队友去行街时她都默默在Studio练舞，听到这里，Feanna不禁惭愧谓：“我觉得要划返条界，两个运动选手再加一个平常人。（有冇激励到你？）系冇嘅。”
队友食鸡肉鸡蛋 恶魔Feanna竟食卡邦尼
她被Mandy踢爆，当Mandy和Vian日日食鸡胸、鸡蛋，她竟吃芝士卡邦尼，自称恶魔的Feanna笑问：“佢哋两个净系食鸡胸同鸡蛋，人生嘅乐趣喺边呢？你明唔明呀？做咗一日嘢已经好攰，你喺韩国㖞，唔出去食烤肉、芝士拉面、煎饼都对唔住自己啦，我嘅职责就系每日揾啲好嘅餐厅带大家过去，肚饿食吓鸡蛋冇问题，但系正餐都一定要食啦。”为食的她更直认不明白何以Vian和Mandy连朱古力都要食零糖，问“咁食嚟做咩呀？”不过Vian同Mandy都不讳言，有这位“Foodie担当”在旁的确好幸福，享受了很多美食。
请按下图睇更多Me&专访靓相：