专访｜黎展峰喜获乐迷赞唱功与刘德华齐名 目标：做到新一代Andy
25岁英皇新进歌手黎展峰（Andy)上月推出第四首个人单曲《不眠来电》，发布短短一个月YouTube点阅率突破34万，而且获得网民高度赞赏，力赞唱功更与刘德华齐名。Andy接受《香港01》访问表示：“我好希望可以做到新一代嘅Andy，啲人一叫呢个名就会谂起我，系我一个嘅目标，讲起呢个名就会记得我嘅作品同埋音乐。”他透露英文名叫Andy的原因，他说：“我细个因为好钟意睇刘德华先生嘅戏，所以就改咗个名，因为佢又会唱歌又会演戏，系一个好全能嘅一个艺人。”
参加《冤枉新秀训练营》而入行
讲到入行的经过，Andy表示自己从中三开始参加歌唱比赛，一直希望获得伯乐赏识，可以加入乐坛签约做歌手。他续指参加英皇娱乐举办的《冤枉新秀训练营》而入行，并表示：“入咗决赛，𠮶阵时我系唱歌，佢（工作人员）问我你有冇兴趣想做歌手，跟住佢话希望都可以签你，我都冇太多考虑，因为参加比赛嘅目的就系想接触公司，同埋签约公司，人哋愿意，我都愿意！”他继续指现阶段正在上演戏及跳舞课程，希望能在歌影视三栖大展拳脚！
新歌《不眠来电》灵感来自真实故事
提到新歌《不眠来电》创作，他表示灵感是来自于自己的真实故事。他忆述：“大学时期钟意咗一个女仔，暗恋佢啦！同佢倾偈同埋买野比佢，有少少似佢只兵。我连续三晚发梦见到佢，𠮶阵时好唔想瞓觉，因为一瞓觉就见唔到佢。”被问到梦想中拍拖的地点，他笑说：“正常拍拖行街，去下啲乐园玩，因为我就系双鱼座比较天马行空。净系系个梦入边，实际系冇发生嘅。”讲到对方是否收到他的爱意，他说：“佢知，佢话唔好再嘥时间喺我身上，大家都未必有可能，所以我觉得有啲系自作多情。”提及曾经赠送对方的礼物，他表示：“佢做推销员，我经常会买嘢饮去探班，未至于好高级买晒啲名牌俾佢。”他继续指自己会做一些比较心思的浪漫小品给予爱慕的人，并表示：“我好钟意手工制嘅嘢，我钟意拍拖送多一份礼物，惊喜就会加倍，不过我唔会要求对方要咁样做。”
自爆热恋阶段会追魂call
被问到有关初恋的问题，他大方回答初恋是在16岁。他透露中学阶段是念男校，并表示：“唔系好识到女仔。读男校认识女仔就要参加联校活动，同埋返教会！咁我就系返教会，因为自己系天主教徒，同对方认识就开始咗初恋，大概净系拍咗一年几拖！”讲到热恋阶段的时候，他坦然会“追魂call”，更一度直言自己的性格比较黏人。他说：“打电话试过最贵$500电话费，比屋企人闹，而平时电话费通常净系$80，我屈电话公司收错钱。”
入围叱咤已经当赢咗
讲到今年能够与同门师兄张敬轩及古巨基齐名，入围叱咤最喜爱男歌手候选名单。他兴奋表示：“好似觉得自己已经赢咗，全部都系前辈，真心听住佢哋嘅歌佢长大，冇谂太多继续做好自己。”提到许多前辈都有机会缺席颁奖典礼，他坦言：“佢哋应该工作行先，佢哋喺其他好多唔同嘅位置，唔同嘅岗位做啲佢哋想做嘅嘢，张敬轩同埋古巨基就算抽空唔到出席颁奖礼，佢哋系好多唔同嘅范畴去做，同好多唔同嘅年轻新一代歌手去合作，甚至乎会同好多唔同嘅歌手分享，呢样嘢系更加有价值，乐坛可以传承到落去！”此外，他更直言希望储多一点歌曲，将来有机会发行个人专辑为目标。至于最想合作的音乐单位，他雀跃地表示：“好想同陈蕾或者张天赋合唱，因为佢哋好多风格，希望可以争取下机会！”
自揭与同门师兄张敬轩渊源
讲到与同门师兄轩公（张敬轩）的渊源，对方曾经一度出席活动时公开表扬Andy“识得冧人”，对此他仅回应：“可能喺佢觉得我冧到佢，又或者系我个性格比较想系咁样，唔系刻意。”他指公司的行政上最近转了新一组经理人，并表示：“轩公（张敬轩）嘅经理人都系我嘅经理人，所以最近接触就多咗。佢都会分享佢嘅经历指点一下我。”他主动提起轩公向他说过的话：“我最深刻系佢成日同我讲话一样嘢，你要相信自己，就可以好投入系件事，当你好投入嘅时候，观众就可以好投入，同埋好容易攞到共鸣。”他继续指轩公分享音乐上的知识，或者待人接物的做法，令自己获益良多，绝对是一个值得学习的前辈！
Hair : Kevin Liu@myös
Make up : Davina@ CyrusLeeMakeUpTeam
Wardrobe : @pumahk
Venue : Mozy Cafe and Bar @mozy.hkg