吴若希为囡囡fb开战　爱女大过天︰有人伤害我个女同佢死过！

吴若希（Jinny）早前在个人Facebook指骂有人未经她同意上载囡囡淼淼照片至Instagram，又明指“我冇呢啲onX朋友”，对囡囡照片“被曝光”明显嬲嬲猪。前日Jinny焗住亲自公开囡囡正面相，有网友对囡囡批评小朋友外观，昨日Jinny在Instagram再出招责骂网友。

其后Jinny再写长文回应，爱女心切的她明言︰“其实我从来都系烈果type，只系有时选择由得佢！但系我话你知，如果有人伤害我个女～ 我真系会同你死过～～理得你乜嘢公众人物～ 我做人阿妈连个女都保护唔到～ 我不如唔好生？！”其中文中提到不希望囡囡在网络上被攻撃，又坦言︰“我个女，呢一世都系我个女，我无得拣、我个女都无得拣，作为妈妈永远希望俾最好的俾自己嘅仔女，我唔想佢喺成长过程中因为妈咪嘅身份而被一班键盘战士攻击。”此文post一出引来好多网民热论，有不少网民撑Jinny出声保护爱女，亦有人指Jinny不应该讲粗口，不过Jinny亦反撃“边个唔识讲粗口？因为我讲粗口我个女要俾人笑？咩歪理？”

昨晚Jinny男友Alex亦出文支持女友，先多谢大家留意囡囡的外表，又笑言︰“老人家成日讲当个BB出世后要成日话佢好丑样，唔好赞佢，咁佢第时大个一定好靓女好叻女～”又大赞“始终系我们个世界入面最prefect（更正为Perfect）！”对于Jinny讲粗口被网民责骂，Alex真男人上身，保护女友︰“所谓的黑粉请不要再侮辱我家人！就算我个女，我老婆有几任性，公主病。讲粗口又点？咁又点？我钟意呀！我爱呀！所以你们讲咁多又点？I Don't Care！”又忠告网上黑粉留言三思而后行。不少网民都叫Alex氹下Jinny，又借机催婚话︰“讲够无谓，明媒正娶最实际”今次Jinny和Alex都表明为了保护爱女淼淼，会做尽一切保护小朋友。