森美曾担任加密货币兑换店代言人　澄清冇走佬：咁啱我放假

森美、小仪、梁嘉琪今午（6日）为格价平台颁奖礼担任主持，三位当中，森美直认自己是精明消费者，购物前一定会做足功课。“我买咩都会成为𠮶样嘢嘅专家。譬如相机，小朋友细个时一定要用快门快；到佢哋返学有表演时，又会需要部有得zoom嘅相机，因为佢哋开始有表演。”小仪透露如果森美有意入手任何物品，他必定利用节目空档时间仔细研究，甚至会问大家点拣。梁嘉琪表示在购物时会以性价比为出发点，而小仪属于冲动消费，幸好大多数时间都会有森美提点。

森美早前同老婆到西班牙旅行，期间不慎跌烂手机，问到是否同老婆玩得太激，他笑言：“我都想激，难得去旅行，小朋友又唔喺度，紧系要激啲，一日去三、四个景点，激到老婆都话顶唔顺。（其他方面有无顶唔顺？）老婆望住我已经顶唔顺，望咗廿年，哈！佢成日都问我系咪喺节目都咁话嘉琪同小仪，人哋点解会顶得顺。”森美表示随著小朋友长大，为吸引对方与自己去旅行，除提供商务客位外、又会拣高消费国家，绝对系用心良苦嘅好爸爸，他又表示囝囝因在英国读书，为令对方回复讯息，不惜大洒金钱。“只要佢每星期覆我、视像，我都会有额外零用钱，成效高，同埋我会鼓励佢去睇多啲博物馆、音乐剧，门票都可以实报实销，我唔介意花呢啲钱，因为唔想佢成日宅喺宿舍温书，所以就算佢去睇球赛千几蚊门票我都照畀。”

另外，提到早前外游期间，被网民指为老佬避开警方追查加密货币，森美表示：“事件咁啱喺我放假时发生，呢件事大家都好关注，如果警方有咩需要我随时都可以尽市民责任去协助。（警方暂时都未联络你？）未。”