恋讲嘢｜松冈李那自爆富豪追求攻势　情陷穷小子搞到入院收场

日籍模特儿松冈李那2000年来港发展，样子甜美加上完美身材，所以一出道已经有唔少工作机会。而佢嘅绯闻系同样多姿多彩，除林德信之外，有传佢曾搭上周焯华（洗米华），亦被影到出席美籍台湾富商饭局。

松冈李那作客《晚吹 - 恋讲嘢》， 直认曾被不少富豪追求，仲话：“司机？一定啦！飞机？有人有。”至于礼物方面，除咗名牌手袋之外，亦试过收999枝玫瑰。不过松冈李那就话太进取反而会令佢害怕，而佢亦深明“靓仔、有钱一定受欢迎”嘅道理，所以最终都无缘成为富豪女友。

而被松冈李那睇中嘅，系一名艺术创作嘅穷小子，松冈李那仲话自己第一眼见到对方时，已经有“我会得到佢”嘅感觉。虽然呢段旧情已经有成10年历史，但松冈李那如今讲起都仲会手舞足蹈，足见当时几sweet。“我哋拍咗拖3、4个月，突然间决定结婚，但到咗第二日我好惊，我话佢未见过我父母，所以都系等等先，佢都明白，跟住就设计一张结婚誓言书，我哋喺上面签咗名，感觉好似结咗婚。”

松冈李那同对方拍拖一年半后分手，最失望嘅系男方喺分手后极速另结新欢，但两星期后要求同自己复合，而松冈李那因为太钟意对方，所以应承咗。但二人不时有争吵，由于广东话唔流利，所以松冈李那连闹交都系send email。“因为屋企人唔喺香港，所以好孤独、情况好差。”松冈李那最后患上抑郁，最严重时试过因为过度用药被送院，留院一星期，二人最终协议分手，不过松冈李那话如今仲同对方保持联络，因为早已视对方为家人。