石天欣前年急回港照顾患癌母 月前离世按遗愿安排做“无言老师”
TVB前艺员石天欣于2016年结婚后随夫移居到美国，但前年因母亲Daisy患癌而紧急返香港照顾她，而石妈妈于月前已经逝世，前日（2日）是石妈妈的生忌， 石天欣发长文怀念。石天欣文中指自己已经遵从石妈妈的遗愿，捐赠遗体成为“无言老师”。
石天欣除了亲手剪辑了两条短片给石妈妈做生日礼物外，还在文中提到知道她的遗愿是做无言老师，所以特地为石妈妈安排了“在家离世”：“因为喺屋企一定会舒服啲、开心啲、静啲，屋企人又可以随时随地见到，可以亲自亲手照顾佢。”因为做无言老师是不可以经过解剖，她又在文中详细解释在家离世的资料。
石天欣亦因为陪同石妈妈抗癌，所以有不少的心得，她亦分享了纾缓因化疗而导致的副作用方法。石天欣指石妈妈发现癌症时已经是第4期，当时医生估计石妈妈仅余数月的寿命，但仍然努力鼓励她们：“我当时都好伤心，但令到我更加珍惜，因为如果真系得几个月，我就要好好咁同佢过埋呢几个月，最终我哋有多两年嘅相处时间，我非常感恩。”之后她又陪石妈妈去了法国和英国旅行，还在文中分享了不少的资讯。
石天欣怀念石妈妈的长文如下：
Happy Birthday mum 🤍 I miss you
I will keep trying to live a good life
知你成日喺我唔喺香港嘅时间
都会开YouTube睇我啲片
所以今日剪好条片 送俾你做生日礼物
虽然唔知道天堂到底有冇得睇YouTube
但我都会继续剪更多片俾你睇我好好咁过
虽然暂时我未可以做到 但我会继续努力
尝试寻找其他令我想生活落去嘅理由
当年Daisy 完成疗程之后曾经话要出本自传
🌞谂住可以帮到其他人 点知唔钟意写字嘅佢
最终一个字都冇写到🌚所以不如
如果大家有关于做化疗或者在家离世嘅问题
可以喺下面留言 我尽量解答我识嘅问题
由于Daisy嘅愿望系做到无言老师
而我知道做无言老师系唔可以经过解剖
所以我安排咗在家离世
由于在呢样嘢 都唔算普及 有冇咩宣传
所以其他人听到我哋嘅做法之后
都觉得 原来可以咁㗎？有啲咁嘅嘢咩？
如果系有需要嘅情况 我都会推介在家离世
因为喺屋企一定会舒服啲 开心啲 静啲
屋企人又可以随时随地见到
可以亲自 亲手照顾佢
提供在家离世服务嘅机构都有唔少
我亦唔系想推介任何一间
我只系想同大家介绍呢样嘢
由于如果病人 唔喺医院或者院舍离世
正常都系需要俾法医解剖
所以如果首先安排在家离世
就可以喺屋企人离开之后
叫返主诊医生上门签死亡证
然后殡仪公司安排行街纸
就可以直接由屋企带去需要去嘅地方
但当然 如果有需要 唔能够留喺屋企宁养
都系需要入院接受协助
但如果病人唔想进行急救
就要喺病人清醒嘅时候签定一份
预设医疗指示 定立是否及如何急救
但因为制度未完善 所以如果需要去医院
但叫白车 救护人员系唔会跟随医疗指示
所以必须自行去医院 及提供正本
等医疗人员知道病人自己设立嘅决定
🌜好多长辈都好佩服我咁样安排
因为佢哋都觉得留喺屋企会系最舒服
我都好庆幸自己有咁样做到
令自己唔需要后悔 喺佢离开嘅时候唔喺佢身边
化疗方面 我可以分享少少非专业
病人同家人嘅感受
因为大部份医生都只系依书直说
真正感受嘅只有病人自己
同埋每一个病人都会有唔同嘅反应
所以最重要系病人同照顾者嘅沟通
大部份做化疗嘅人都会有手脚麻痹嘅感觉
例如明明脚掌已经掂到地 但佢感觉唔到地面
所以病人自己要比平时小心 而麻痹嘅感觉
就好似坐咗喺屎坑好耐之后觉得被痹嘅感觉
呢个感觉会随着时间而退减 亦有机会唔减退
做紧化疗嘅时候可以拎啲温暖嘅嘢
可以减低唔舒服嘅感觉
另外通常会皮肤干燥 用返啲超润嘅cream
沉聚嘅黑色素就要等佢自己慢慢退
Daisy亦曾经试嘴部麻痹 饮水差啲浊亲
所以安全起见可以用饮筒同埋细担饮
通常比较困扰病人主要应该系味蕾异常
佢哋唔能够食到食物原本嘅味道
所以会令到佢哋食欲减低
当时我都花咗好多心思
买同煮一啲会吸引到佢想食嘅嘢食
因为做完手术之后已经轻咗好多
所以更加需要吸收多啲食物增磅
(我发现有啲脂肪未尝唔系一件好事
我呢啲风都吹得走嘅 有事就系咁走先🌚）
另一个困难嘅问题 就系恢复白血球
由于做化疗都系需要白血球指数合格先可以做
(坊间传闻就系饮花生衣水 但我哋就冇试过
因为Daisy有洁癖🥴）
当时我哋都要靠打升白针 先可以追上疗程
但升白针都会有副作用 例如发烧骨痛
最后仲有免疫力比较低 所以我哋尽量留喺屋企
不过当然最重要嘅一定系屋企人嘅关怀
好多讨论区经常都会提醒照顾者
千祈唔好相信医生讲嘅生存机率
因为医生讲嘅系根据大部份人嘅数据
所以千其唔好感到绝望
病人都唔好轻信自己好快会死
想当年由于Daisy嘅情况真系好差
所以医生都系估计佢得几个月
我当时都好伤心 但令到我更加珍惜
因为如果真系得几个月
我就要好好咁同佢过埋呢几个月
最终我哋有多两年嘅相处时间 我非常感恩
当然有时乱谂嘢 都会谂系咪做错咗啲咩决定
因为我哋喺22年3月做完电疗之后
就冇再做任何其他嘅疗程
喺医学上 医生会建议你继续做镖靶疗程
但清醒咁谂 其实镖靶都系会有一日唔再适合
病人接受疗程嘅期间 生活质素都会下降
所以家属同病人就要谂清楚系咪继续
因为医生都会讲得好清楚 系有机会抗药性
对我嚟讲 (纯粹个人意见)
癌症治疗其实同美容院差唔多
就好似你做咗一个暗疮疗程
唔代表你以后冇暗疮 唔包保你一定冇暗疮
做咗之后 你先会知道个结果 有用定冇用
医生系推介俾你可以咁做 但唔包保一定得
所以最重要系病人自己嘅决定
当时Daisy癌指数已经回复正常水平
所以我哋决定唔继续治疗
让佢再一次好似正常人咁活多一年多嘅时间
好多朋友家人都以为佢已经好返
但真心讲肠癌四期 其实就等于末期
好难做到体内所有嘅癌细胞都能够清除
就系因为唔能够完全清除 先会叫做四期
病人通常只可以活多几个月至到五年
所以大家可以叫病人家属加油
最好唔好讲早日康复 （因为系废话）
想当年我听过好多人咁同我讲 但我冇嬲
因为我知道大家对癌症嘅知识唔系咁深
所以好希望藉著Daisy可以令到大家有更深嘅认知
好啦 大家有其他问题可以喺下面留言
或者直接揾癌症基金会询问
@misstinab.in.usa
今个年度我哋都捐出咗$38000
希望佢哋可以帮助到更多有需要嘅人
我会继续努力工作
希望每年有能力捐钱比有需要嘅机构