专访︱强尼见证陈瑞辉成长不再隐形 Frankie克服唱歌恐惧变自信
陈瑞辉（Frankie）以往常被说是MIRROR中的“隐形人”，不够进取，安于站在队友身后，经理人花姐曾说：“完全睇唔到呢个人。”甚至连他自己都曾经在《调教你MIRROR》中讲过，不看好自己在团中的定位、唱歌对他来说是个包袱等等。不过，连一首Solo歌都未出过的他，却比其余11位队友更早担正演出音乐剧，伙拍睇住自己入行的强尼。强尼直言Frankie变化甚大，现时对唱歌已毫不犹豫，而Frankie就剖白自己逐渐放开、站上台不再尴尴尬尬、敢于唱歌的原因。
Frankie 18年参加《全民造星》入行，虽然30强止步，幸得经理人之一的宝姐赏识，凭住零死角靓仔样直入MIRROR。不过以往观众对他印象不算深刻，至近一、两年终于崭露头角，《IT狗》的Never、《野人老师》的颜家栋，让大家渐渐看到他的演技发挥。他更被音乐剧《大象的告别式》的出品人兼艺术总监黄靖程相中，出演其中一位主角陈朗，而强尼则是另一主角Doctor Cheung。
自信增强 因为MIRROR互相斗抢才最好看
担任《造星》主持的强尼，相隔5年再与Frankie合作，认为他不同了许多，首先一定是放开了，强尼说：“唔系话佢以前收埋，但系可能以前习惯，有12个兄弟，我可以唔使讲咁多嘢，大家有各自位置，even访问都系咁。第二就系呢个剧我哋围读，你唔会觉得佢而家觉得唱歌需要有犹豫，一唱就好肯定，试Key，绝对好肯定！”他认为如今的Frankie已不再是五年前《造星》的一位参赛者，而是香港一个非常成熟、经验丰富，去过很多大型表演的表现者，坦言：“每一个表演都好瞩目、好多人睇，所以佢呢几年储落嚟嘅嘢，绝对唔简单。”
讲到为何信心会突然变强，Frankie直认以往觉得自己跟队友就像12块砌图，虽然有共同特质，但各自有自己的岗位、功能，后来才发现并非如此，“以前会Block咗自己，觉得佢有呢个、佢有呢个，我畀佢发挥啦，我自己就唔攞出嚟，但系而家就发觉原来最好睇嘅系大家都互相斗抢𠮶样嘢，一齐发光先最好睇，所以主动性强咗。”强尼就提到，在《MIRROR "ONE & ALL" LIVE 2021》演唱会上，见到Frankie与4位队友著恤衫大唱《铁幕诱惑》、《有效日期》，已经觉得他有所不同，展露出观众从未见过的一面。
Frankie克服对唱歌恐惧 想挑战个人舞曲
《调教你MIRROR》中，主持梁祖尧曾要求12位镜仔从跳舞、唱歌、演戏中投选自己将来最想发展的方向，Frankie是唯一一个希望继续以跳舞为主轴的，不过他后来拍戏、做主持，到现在主演音乐剧，方向似乎比当初阔了很多，因为他的思想开放了，觉得可以多尝试不同范畴，无谓抹煞自己可能性，Frankie说：“每个范畴都好新鲜，就尽力做好自己，当中攞个Enjoyment，或者唔系跳舞，或者唔系演戏，或者可能系唱歌，我自己都未知，只不过系我自己将每一样嘢都抱同一个态度去睇，就系我一定要喺入面好享受嘅，做得舒服就OK。”
解锁了音乐剧后，Frankie对自己唱歌信心加强不少、克服了对唱歌的恐惧，讲到对于出个人单曲的想法，他一直都想，不过由于是第一次，他希望是一些对自己很有意义的讯息，尽最大努力把想法变得精细，又表示：“边类型嘅歌我都OK，睇吓个想法系用边一类表达得好少少，但系我相信都会有跳舞，因为我自己都钟意用跳舞去表达。”
演音乐剧唔怕发台瘟 强尼佩服歌手记舞步
强尼已非首次演舞台剧，不过Frankie则是第一次，他出名记性差，更有“化学老师”的别名，演音乐剧上到台冇得NG、讲对白又要一气呵成、更要记埋歌词，他亦不讳言这绝对是压力最大之处，唯一解决办法就是排得更熟。他亦庆幸角色之间的对白都很平均，讲到会否担心发台瘟，一向做主持不用睇稿的强尼就说：“有样嘢我唔同佢哋，你话我背文字叻，系因为我工作需要，我觉得文字我都仲有前文后理，我唔明佢哋点背舞步，你唔觉得背舞步难过背文字咩？我永远唔会明，一个演唱会几十只歌，点会记得𠮶只歌下一个Step系乜嘢？我觉得每个人都有自己嘅Muscle Memory，舞台剧嘅好处就系我哋真系经过排练，个几月，啲嘢就会入咗去里面。”
大谈人生遗憾 强尼悔恨以往常否定自己
《大象的告别式》主题是失去、遗憾，两位也坦言过往的人生有遗憾之处，Frankie一边投入角色，在剧本中竟看到从前的自己，“失去咗一啲讲说话嘅勇气，有啲嘢需要讲出口，你先至会同对方Connect到，冇讲就真系冇讲，可能创造咗啲遗憾出嚟。（而家已经讲唔返？）系！”而尽管现在再有一个机会，Frankie觉得，自己有更大勇气都好，机会错过了就不能回头，“而家我系够胆讲，但一定要喺𠮶个moment讲𠮶句嘢先有𠮶个份量喺度，所以遗憾就系遗憾，大家唔好错失。”
至于强尼则后悔以前不够主动去争取机会，又说：“如果更加早可以肯定自己钟意嘅嘢，包括工作、理想，坚持肯去争取，会唔会为自己争取多啲时间去做更加多嘅嘢呢？”众所周知以往强尼任职工称师，但三十几岁才毅然放弃高薪走去讲波，慢慢才发展成全能主持，再获得拍剧、做音乐剧等更多的机会，但他却说心目中的后悔，不纯粹是转跑道转得迟，而适用于人生其他决定，“人有时会否定自己，‘我未必真系咁钟意㗎啫，唔试都冇所谓’，你会尝试否定一啲嘢，对自己未必最老实，因为你知有啲嘢系困难，你好惊失败同失望，你会将自己心目中个理想揿低，其实行耐咗你会知道唔系，我一早知𠮶样嘢，不过唔够胆啫。”听到这里，Frankie就寄语大家：“只要相信自己，无限大！”