谷娅溦餐厅拍片被粗口问候 澄清拍摄前已问准：我系冇问题

歌手谷娅溦不时在小红书拍片分享生活，早前她就亲身到旺角人气茶餐厅拍片品尝地道美食，但过程中却被店员用粗口问候，并阻止拍摄，双方发生口角。事后谷娅溦将相关影片公开后，点评侍应“态度差”，事件引起网上热议，网民反应两极。

谷娅溦今日（7/8）现身深水埗出席无线热播剧集《破毒强人》宣传造势活动。就事件接受《香港01》访问时表示：“其实我拍片嘅出发点，都系想介绍香港嘅美食，令到更加多游客认识。但好无奈拍片嘅过程就发生不愉快事件，而我将条片放出嚟，我系冇其他特别嘅意思，只系想摆出呢个事实出嚟，都系想香港愈嚟愈好，想大家有进步，所以先讲真嘢。（网民对呢件事反应两极！)我系明白嘅，咁所以我系做唔到令到所有人都钟意你。明白你嘅人永远都会明白你嘅，唔明白你嘅人，就算跳到黄河都洗唔清。”

问到被食肆职员用粗口问候，有否不开心？谷娅溦表示：“唔开心梗系有，但我唔开心主要系自己有啲内疚，谂返转头当下嘅自己处理方式系咪可以再好啲，而我本身系想将件事话俾大家知，我哋有呢个问题，我哋系咪可以一齐去解决呢件事，我哋可唔可以用好啲嘅方式，去接受一啲唔好嘅嘢，咁所以系呢一方面，我系学习到嘅。（网民觉得职员唔应该用粗口问候！）其实如果佢埋嚟同我讲叫我唔好拍，我系冇问题，而我都好接受，明白到佢哋做生意，我系唔会阻佢哋嘅。同埋我入呢间餐厅前，我系第一时间问清楚，可唔可以拍片？如果佢哋话唔可以，我就一定唔会入去。而我嘅本意系希望自己作为一个桥梁，可以令到大家知道香港有咩好食，有咩好现俾大家。（你会唔会再落去𠮶间餐厅食嘢？）我都会去呀，因为一样还一样嘛！”