张曦雯三点式泳衣相索到爆　仲有秘诀教你keep住魔鬼身材

张曦雯(Kelly)人靓身材正就众所周知，不过三点式大解放就真系比较少见。近日她为了拍摄TVB旅游节目《3日2夜》，远赴渡假圣地毛里裘斯拍摄。去得毛里裘斯，阳光与海滩当然是重点，咁阳光与海滩加美女嘅催化剂系咩？紧系三点式喇！Kelly昨晚就在自己的Facebook上载了自己的三点式泳照，相片一出已经惹来大批网民围观兼赞好，果然美女三点式呢个组合真系唔讲得笑！

著得三点式上身，相信都要有好大嘅自信心，Kelly接受《香港01》访问时说：“都有信心嘅，无信心就唔会影，但都无特别做啲咩，因为我都钟意自然啲真实啲。其实我系好钟意阳光与海滩，我喺美国𠮶阵都系咁，可能返咗香港就少咗啲呢类活动，所以当我要拍旅游节目离开香港嘅时候，就会比较开心同埋著三点式去沙滩，唔会谂咁多嘢，我好enjoy呢种感觉。”Kelly表示在香港很难好好地享受阳光与海滩，因为人实在太多了，而且水亦不够外国清，所以无咁舒服。

能够有咁好嘅身材，相信都落过唔少苦工，咁Kelly又点保持呢个魔鬼身材呢？她说：“平时我有做开瑜伽，其实如果大家要keep fit或者减肥，唔好唔俾自己食钟意嘅嘢，我觉得呢个好紧要。因为之前试过想keep fit，例如我好钟意食薯条或者朱古力，又唔俾自己食淀粉质，我觉得会好辛苦。同埋好快就会反弹返，始终想食嘅嘢始终都要食，当一有机会食就会系咁食，所以应该系食少啲份量同埋隔开食。”估唔到佢都几有自己嘅一套，见佢咁好身材，相信大家都可以跟佢方法试吓！