中年好声音2｜李思捷旧爱Naomi参赛　曾追张致恒还债出重口味写真

《中年好声音2》海选昨日第三轮，有唔少出道艺人参加，除多位歌手外，亦有“过气𡃁模”冯镓潆（Naomi Fung），佢10年前出过全裸写真，但一直有个歌手梦，更获表哥林俊贤拍片撑报名。Naomi以往经常因唔同“惹火”事件登上娱乐版，最出名不但系隆胸出全裸写真、同李思捷传绯闻，更曾公开向张致恒（Steven）追债！

冯镓潆（Naomi）昨日现身《中年好声音2》海选，一出场即自认“过气𡃁模”并大打人情牌：“我最为人记得就系11年前我出写真，我系写真𡃁模，今日我系过气写真𡃁模嚟㗎喇。志伟哥我哋见过㗎喇之前，我喺电台都见过你！”38岁嘅佢话上届已够年龄参加，但男朋友极为反对，又话：“上届……差唔多有廿几个Friend入，出面都系我啲朋友，100强、8强都系我细个比赛嘅战友嚟。仲有……”

一路听到皱晒眉的肥妈突然打断她说：“你今次唱咩歌？”Naomi回答是《野孩子》，再把未讲完的话说完，“仲有就系我想参加呢个比赛，系因为上《中年好声音》之后想上奖门人！（伍仲衡：唔一定有㗎㖞。）同埋我表哥叫我参加呀！佢撑我呀！佢唔撑自己个女选港姐但系佢撑我参加《中年好声音》，呢个系Main Point。”

到底边个系佢表哥呢？原来系林俊贤，所以佢意思系林俊贤唔支持林钰洧选港姐，但都支持佢参加《中年好声音2》。林俊贤果然好撑佢，拍埋片支持，但声沙沙的Naomi最终表现麻麻，评判叫佢要留意音准同呼吸声。以下就数下佢多年来嘅惹火事件簿。

1.为重口味写真隆胸

Naomi当年系写真𡃁模，意识非常大胆，全裸上阵之余亦大骚乳环同小便相，佢宣传写真时自认有隆胸，做自体脂肪移植，令上围更丰满。佢话去台湾Motel影写真时，为咗提升真实感，连去小便都影埋，“我原本谂住扮去紧，但摄影师话真系屙先至真。”而多年后，Naomi再自爆隆胸因由，原来系因为前男友“偷食”上围丰满嘅第三者，佢深深不忿所以都去隆胸。

2.传曾为李思捷自杀

李思捷同王宝葆（春卷）拍拖时，有记者影到李思捷同Naomi去澳门过夜，令佢背负“小三”之名，之后更有传佢为李思捷自杀，不过Naomi就否认：“我冇自杀，之前负面新闻太多唔开心，饮醉咗，后尾失眠我食安眠药，但醉咗食错份量，前经理人见到我𠮶时我系头向地，脚向上，结果住咗3日医院。”不过依家Naomi感情美满，同细自己10年嘅陈汉娜细佬Angus拍拖一段时间。

3.公开向张致恒追债

张致恒欠债唔还臭名远播，原来Naomi都系佢债主之一，佢闹爆Steven有钱搬屋冇钱还债，话如果佢再唔还钱，就会去Steven同大J打嘅拳赛公开追债，最后果然好快收数成功。Steven老婆雯雯就出Post话过Naomi威胁佢哋家人，所以就算借财务公司都还钱畀佢，更问：“点解要讲到揾人去骚扰我嘅妈妈拎返属于你嘅钱？”不过Naomi就否认骚扰对方屋企人。

4.自爆被导演“潜规则”

前年Naomi上ViuTV节目《恋讲嘢》，话19岁时曾被导演以“新戏有个角色好啱你”为由，邀请上屋企睇VCD，对方突然拉开裤链，更掏出下体，佢惊到问对方：“你唔系有老婆㗎咩？你点解咁嘅？”对方话：“我老婆唔喺香港呀，你唔使惊呀。”之后Naomi就揾借口走人。

5.投资美容院陷医疗事故

Naomi有份投资的美容院“妍肌攻管”去年卷入医疗纠纷，报道指岁女事主于美容院推销下打溶脂针，其后不幸毁容，索偿疗程费用及精神损失费用。Naomi曾开记招否认指控，表示冇硬销，而且事主相隔8个月至要求索偿，冇任何证据证明其毁容状况同经手医生嘅疏忽或专业失当有关，加上对方做完第一次埋线都有再预约下次疗程，Naomi亦都话：“所有手术疗程都有风险”。