【不懂撒娇的女人】王浩信演暖男系好戏　推到年尾成视帝大热　

王浩信(Vincent)上年凭《EU超时任务》饰演渠头一角而被网民捧成视帝大热，虽然最后只与同剧的朱千雪一同获得“最受欢迎剧集搭档”，视帝宝座则饮恨于同样是大热剧集《城寨英雄》的陈展鹏，不过佢喺TVB马来西亚和星和颁奖礼都拎返个最喜爱TVB电视角色，但网民们依然替他不值。直到刚刚《不懂撒娇的女人》播出后，Vincent饰演程日晖(Saving哥)一角大受欢迎，视帝呼声又再掀起。

在该剧中，Saving哥是一个市井之徒，虽然开咗间公司，但就欠债累累。不过每个男人背后都有一段深刻嘅感情，佢都唔例外，呢几集佢开始回顾返以前嘅情史。平时做一个贴地嘅装修佬，演出极之自然，完全无违和感，而且讲嘢方式够市井够搞笑，演绎手法之好立即将其他演员比落去。当然今次咁出位，角色设它都帮咗佢唔少，就好似上一套剧嘅渠头一样。今集佢呢个角色本来系背负住一段伤心嘅感情经历，不过随住个ex结婚就得到解放，当佢讲起段感情时眼神就好像懂得做戏一样，内疚、唏嘘、伤心的感情标晒出嚟。随住佢同唐诗咏嘅感情线开始浮面，而且佢仲系总经理林文龙唯一一个手下，相信之后都会有大把发挥。

其实喺呢两套出位剧集之前，喺《楼奴》入面做楼耀明呢个角色都做得好出位，呢套剧系佢第一套做男主角，仲系第一次被提名“最佳男主角”。喺呢套剧之前其实Vincent都被提名过几次“最佳男配角”，不过4次男配加埋2次男主都系食白果收场，最多都系拎吓啲猪肉奖，你话佢无演技咩？唔系呀，大把人认同佢，尤其系一众网民。你话佢唔落力咩？当年佢喺两套剧入面加埋连续俾人掴足三十几巴，打到连佢自己都话被人掴到颚骨移位，认真惨。你话佢唔努力咩？又唔系，作为男主角每年都有两套剧出，算系咁喇。

睇返今年其他有力竞争对手，以播咗剧嚟睇，陈展鹏、郑嘉颖、马国明暂时都平平无奇，林文龙、罗嘉良、张兆辉唔似会玩颁奖礼，袁伟豪、洪永城未够班，如果照住呢个势，王浩信唔系话无机会。咁睇吓之后半年，萧正楠有《翻生武林》同《超时空男臣》，陈展鹏有《同盟》，郭晋安有《老表，毕业喇！》，陈豪有《使徒行者2》，王浩信自己都仲有套《踩过界》。当然之后嘅剧仲未播，无人会知另外几位男演员会有咩发挥，不过Saving哥以暖男呢个定位已经深入大众人心，只要佢系下套《踩过界》继续出色，相信会同上年一样，都依然系男主角大热。

除咗喺剧集做暖男，其实现实中Vincent都系一个暖男。同老婆陈自瑶生咗个囡囡之后，除咗拍戏之外嘅时间都俾晒屋企，仲不时会成家出去做运动，认真Sweet。其实自从06年出道之后，Vincent在工作上一路都顺风顺水，当年一首《爱妳便爱》成为K房热门歌曲。演而优则唱的他，入TVB后虽然以男配角起步，不过角色依然得到观众的认可。直到呢两三年终于担正，今年亦好大机会连续三年入选“最佳男主强”最后五强，希望唔会再食白果喇！