陈凯琳爆郑嘉颖开IG小红书原因 宣布封肚唔追女：生三个差不多
陈凯琳（Grace）出席护肤品活动，生完三胎的她仍然Fit爆，明艳照人，近年她与老公郑嘉颖常在网上分享家庭生活点滴，一改以往低调作风，她有亲自为嘉颖解释，又大爆近日发掘了嘉颖的新技能。讲到依家有三个仔，将来会否追个女，Grace笑言封肚说：“生咗三个都差唔多啦！”亦表示暂不考虑再拍剧。
陈凯琳（Grace）今日出席护肤品活动，生完细仔Carlos才几个月，Fit爆出席活动，完全冇肚腩冇赘肉，好似冇生过一样。她指自己不像以前般注重收身、修型，不硬性要求自己几多吋腰、几多磅，反而注重健康多点，Grace说：“当然我好钟意食甜品大家都知，但系食太多糖分会令你有暗黄，同埋调理得唔好又会有其他问题出现，所以而家真系忍唔住先会整件蛋糕。”
Grace做妈妈后不时煮嘢食畀三个仔仔，透露他们最爱食意粉、鸡蛋和饭，都很易煮，讲到会否挑战高难度菜式，Grace说：“难𠮶啲其实冇，因为小朋友食嘢都比较简单，亦唔需要食得好重口味，有时我上网睇到啲meme好好笑，成台都好丰富，你整到九大簋，但系佢哋都净系问你有冇白饭同蒸蛋。”
老公郑嘉颖一直以来都好少下厨，但Grace就指近来有一次令她很惊艳、大开眼界，“有次佢煮咗个意粉，我有拍片，未post出嚟，非常之成功嘅！我初初仲谂得唔得㗎，系咪真系好食㗎，但系小朋友食嘅时候系问妈咪仲有冇，话好想再食，我话你叫爹哋煮畀你食啦。”
嘉颖以往为人十分低调，甚少经营社交媒体，但近年却经常与Grace拍家庭生活片，先后开IG和小红书等，讲到这个转变，Grace都同意，她表示：“佢平时好少影相，但系发觉有小朋友嘅时候，佢好想保留呢个回忆。因为小朋友长大得好快，咁细个突然间就长到好似你咁高，现阶段要影多啲相留念，有多啲嘢可以分享。”
日前嘉颖和Grace去食平民茶记和买面包，难得掉低囝囝去拍拖，Grace指生小朋友后，只得夜晚三个仔瞓著觉后可以二人世界，睇波、食零食、倾偈，一系就小朋友返学时，下昼揾个地方撑台脚， 她最爱食西多士、猪扒包，有时食碗面已经好爽。讲到会否常被网友捕获，她说：“冇所谓嘅，大家都好善意，其实你行埋你同我哋影，好过你喺侧边影完我哋唔知，大家都系想同你有一张合照啫，不妨行埋嚟，打声招呼就影得㗎喇！”
Grace目前都以拍片和KOL工作为主，她坦言暂不考虑复出拍剧，并谓：“我自己都想分配多啲时间喺屋企，好多妈妈都同我讲，小朋友大个之后你可以有自己空间去继续工作，而家呢段时间，你唔陪佢就好快错过，我真系唔想错过！如果将来小朋友大个之后记得妈咪几时带过佢去边度旅行、去过啲咩地方玩，会开心过我谂返起十年前嘅工作，有冇错过咗呢样嘢，所以依家都系集中返喺小朋友度。”至于有冇被人叫再追个女，Grace就落闸说：“冇人再问喇啩？生咗三个都差唔多啦！”看来应该封肚！
请按下图睇更多陈凯琳活动靓相：