郑裕玲包剪揼唔认输严寒质洪嘉豪食雪糕　网民：Do姐点玩都赢

郑裕玲（Do姐）离巢无线后，同HOY TV合作拍旅游节目，更有几位年轻男艺人伴游。她最近与洪嘉豪去到德国，在9度严寒下当街猜包剪揼，输要食雪糕，不过Do姐又点会输，就连网民都话未睇已经知结果。

郑裕玲（Do姐）近日与洪嘉豪出发德国拍旅游节目，昨晚洪嘉豪就贴出一段片，当时是9度的早上，手执一杯雪糕的嘉豪提议玩雪糕Challenge，猜包剪揼，输要食雪糕，他唔识死问Do姐：“识唔识猜包剪揼？”Do姐反应极大说：“梗系识啦！”更说要一盘过，点知最后猜咗三盘。

第一局，Do姐出包、嘉豪出剪，但Do姐就话：“你唔得啦！你弹弓手嘅！”嘉豪就话“吓？咁唔玩㗎喇㖞。”不过Do姐就话要玩；到第二局，Do姐出剪，嘉豪出揼，Do姐要食喇啩？点知Do姐用手挡开，话：“你系慢啲㗎！你系慢0.01秒！”嘉豪无奈说：“吓，咁唔好玩啦……”不过Do姐就话：“唔好唔好。”最后，Do姐出揼，嘉豪出剪，此时Do姐立即说：“你输咗！你食！要食晒佢！”并把雪糕塞入嘉豪个口，嘉豪就话：“其实呢，你点玩都赢㗎！”并封Do姐做游戏王。

Do姐就留言：“我知你钟意食溶溶地嘅雪糕，所以我专登比你输！我用心良苦㗎！”网民就话其实未睇都知边个赢，又说：“完美示范‘公就你输，字就我赢。’”、“问Do姐识唔识猜包剪揼，梗系院长你食啦😂”而早前同Do姐去完韩国的细猫就留言：“成就解锁 比Do姐喂食雪糕🍦 好羡慕😂”