一舞倾城｜袁洁仪推阿女卖身　陈星妤要求真掴︰效果最紧要

由王晶担任制作人的《一舞倾城》昨晚（19日）剧情讲到“万国城最后一个处女”KK（陈星妤）获一位城中富豪睇中，被出价800万陪一个星期，鱼旦妈（庄锶敏　饰）为赚取80万仲介费遂向KK妈（袁洁仪　饰）埋手，曾做舞小姐的KK妈为了钱竟游说阿女卖身，两母女因此大吵一场，KK妈更怒掴了阿女一巴，KK哭诉：“由细到大你冇打过我，你竟然为咗钱打我？”KK妈对于一时失控亦感内疚并哭著说：“我都唔想㗎，我穷咗好耐……我真系好惊，唔想好似以前咁穷呀……”KK之后打电话警告鱼旦妈勿多管闲事，岂料反而获悉与其渐生情愫的Marco（关楚耀　饰）的秘密，KK大受打击并埋下其卖身伏笔……

谈到这场戏，洁仪姐姐坦言起初亦接受不了KK妈的角色设定，她说：“收到剧本时我接受唔到佢叫个亲生女去陪客，之后同编审、监制倾偈开会，编审同我讲咗句‘向现实低头’。听到呢句说话之后，我觉得当一个人真系衰到贴地嘅时候，都要向现实低头，演嘅时候就系记住呢句说话去突破心理关口，但个心都系非常非常之难过。今次个角色遇到个衰佬（王俊棠），又要畀佢打又要帮佢还债，令到生活变得好困难，希望大家明白呢个角色点解要咁做。”

讲到喊戏，洁仪姐姐说：“‘我穷咗好耐喇’呢句对白令我好有感受，因为我都试过穷咗好耐，一讲到呢句个情绪就飙咗出嚟。”并续指对KK妈这个角色又爱又恨：“呢个角色令我可以用另一个层面去感受到另一个处境嘅人谂紧咩，提醒番现实中嘅自己其实都好幸福，虽然自己都穷过，但系挨吓挨吓都可以跨过到难关。”洁仪姐姐又谓今次角色相当有挑战性，十场戏中更差不多有九场是喊戏。

至于星妤受访时透露掌掴戏一Take过搞掂，她说：“拍摄前都有试咗两、三次戏，到正式拍摄情绪到咗就一Take过，太多Take反而会影响到效果，同埋我叫洁仪姐真系掴落嚟，最紧要出到个效果。”讲到剧中周旋于两位靓仔关楚耀及高钧贤之间，星妤笑言：“高钧贤就特别暖男啲，好多时都会问我有冇咩帮到手，关楚耀就拍得多爱情片，分享咗好多经验同好带到我入戏，可以同两位被公认嘅靓仔合作，我都好开心。”