全民造星5｜再有“翻版MC”登场　21号瑞铭态度令人侧目

《全民造星5》开播一星期，直到今晚（19日)为止，暂时仲未有参赛者出局。今晚共有7位参赛者出场，包括23号Kim、87号Meow、84号Dai Bon、97号家灏、21号瑞铭、35号Tsoul、以及12号嘅Tomy，当中只有1人跌入复活区。

21号瑞铭喺首次会见传媒时，已被喻为翻版Tyson Yoshi，不过原来除咗TY之外，佢仲被话过似MC同Jackson王嘉尔，相信大家都仲记得上一集出现过嘅MC 2.0（88号Phili)因过份自信而被搣灯，而今集呢位靓仔好似仲“精彩”。 事关佢喺排舞第4日先首次现身，原因系同朋友去咗旅行，而理由系“同朋友/节目组同事夹咗几次都改唔到”。

虽然系咁，但节目组都有send排舞片段俾瑞铭，希望佢可以跟上大家嘅步伐，可惜嘅系佢斋睇，原因系“冇人可以guild到我，所以只系睇，冇跟住去做。”结果当然系被排舞老师狂闹，与此同时，瑞铭表示：“其实我想退出，因为我情绪唔系咁稳。”去到录影厂彩排时，被歌唱老师狠批“连入复活区都难”之后，瑞铭嘅情绪又来了，同其他参赛者哭诉“我第一次on stage”、“我冇出过show、冇busking过”、“第一次戴EARMON”、“我唔想比人foul”、“我唔想止步于99强”睇得出呢位20岁嘅囝囝真系好矛盾……表演完之后，最先俾烬嘅陈咏燊评语系“一灯好合理”，而Edward Chan就因为完全唔认同佢发声方式，所以维持零灯，至于伍姑娘就话：“我唔觉得特别吸引，放弃你又好似好可惜咁，俾灯系因为你特别靓仔。”最后瑞铭以两灯入红组，不过睇嚟佢嘅心态真系有待改善。