法言人｜赵璧渝挨足十年终现宣传海报 哭诉认愧对妈咪：俾我任性
参加无线（TVB）艺员训练班入行的赵璧渝（Osanna）饰演过数之不尽的小角色，青楼女子、妈妈、孕妇、医生、护士，甚至死尸，她都做过，却唯独没有代表作、一个能够代表赵璧渝、一个让观众记得赵璧渝的角色。入行第十个年头，她终于遇上《法言人》Coco一角，首次有较重的戏份、首次与对手有完整的感情线，首次出现在宣传海报上，她难掩兴奋细数着多个第一次。未敢说是挨出头，但总算对家人有交代，妈妈无条件的支持、家庭不富裕仍容许自己任性地追梦，每当提起家人的种种时，赵璧渝总会感触落泪，眼泪包含的是感激，大概还有亏欠：“我会努力赚多啲钱，希望有能力畀妈咪享福”。
演尽“无名”小角色 Coco一角对家人有交代
赵璧渝于剧集《法言人》中饰演一位年轻时曾影裸照的𡃁模、一位单亲妈妈，种种的经历令她变得非常刚强、硬净又倔强。但现实中的她却完全相反，不单只笑点低，给人的感觉亦很柔弱，她坦言演绎角色的确有难度：“导演帮咗我好多，不停叫我‘你恶啲，你最恶系点？’不停将情绪推到最高去讲嘢，希望Coco系完全睇唔到赵璧渝嘅影子。”
首次于剧集饰演有完整感情线、有完整人生的角色，可算是赵璧渝入行十年以来戏份最重的一次，她兴奋高呼：“我第一次喺Poster入面，有个少少嘅纪念同埋对屋企人有个交代。”十年以来演尽无数“无名”小角色，Coco一角总算为赵璧渝交出一张小小的成绩表，亦让妈妈看到自己一直所坚持的：“以前佢睇唔到啲乜嘢，而家可以同人交代下‘个女系做演员㗎’，睇到佢嘅演出，而唔系‘你个女做演员㗎？喺咩戏见到佢？’冇㖞原来。”
好友关心反变压力 不想靠身材上位
亲朋戚友无意的一句问候或关心，都曾为她带来巨大的心理压力：“最开头几年，佢哋都会问‘你入咗行咁耐，忙紧咩呀？拍咗咩呀？有咩作品呀？’真系唔识答，其实一直有返紧工，但你问我有咩代表作，我又唔知点答，我心理压力好大，令唔到妈妈感到骄傲...佢哋关心形式都好啦，我听到会觉得人哋系咪有少少睇唔起，或者觉得你冇发挥、冇前途、赚唔到钱，会问咁点生活呀？”
回想起最打击的一句说话，她轻叹一声沉思良久说：“冇谂过比较Close嘅人会...叫我会唔会做一啲嘢可以快啲上位，性感啲、再性感啲...当刻我比较反感，我唔钟意咁，有几个月系好唔开心，之后消化咗。同自己讲要努力啲、争气啲做好演员工作，希望有人睇到，唔需要净系靠外表同身材去得到成绩。”
收入低生活艰难 日常开支要靠家人帮忙
亲朋戚友曾经问“你点生活？”看似残酷的问题，却确实是现实的考量。赵璧渝坦承生活困难，尤其是疫情的两、三年，生活更甚艰难，有时连日常生活开支都要靠家人帮忙：“Casting、KOL工作乜都冇，又咁啱开始减人工。𠮶几年好少出去应酬，多咗时间留喺屋企，有需要时会问妈妈同妹妹周转一下，系好难开口，尽可能都唔想，但我会话‘一有钱就会还返’，系一个好细嘅金额，够我搭到车、基本日常需要就OK，系挨过去㗎咋。唔系好Friend𠮶啲，曾经有段时间连饮都唔系好想去，因为真系太贵啦个人情，份粮畀咗人情就冇咗一半，又唔想太肉酸。”为了避免不必要的开支，她还会戒食零食，总之悭得就悭，而这样的生活维持了最少四、五年。
没有能力给家用，连日常开支都要靠家人时，最担心自己的，一定非妈妈莫属。赵璧渝透露妈妈快将退休，而她亦切实感觉到妈妈变老，以及对自己的担心：“佢叫我要为自己打算，又话睇唔到我好耐，讲啲咁嘅嘢...佢系好担心我揾唔到钱，第日生活唔知点。”为了令妈妈放心以及为将来打算，她趁着工作空档考获了瑜伽导师牌：“希望可以双线发展，有固定收入，又可以做我钟意嘅职业，妈妈应该会放心啲...我会努力啲去揾家用。”
由当初担心囡囡学坏反对入行，到后来被囡囡的坚持打动无条件支持追梦。谈起妈妈，赵璧渝总会份外感触，眼泪包含的是感激，还有亏欠，她哽咽地向妈妈向下承诺：“知我好艰难咁挨紧，佢都会好鼓励我，去睇我嘅演出。同埋接受我有啲脾气，有时太紧张工作或者唔够瞓，佢冇打击我。希望佢睇到《法言人》会觉得我呢十年嘅努力冇白费...我会继续努力赚多啲钱，希望我有能力畀佢享福。妈咪好叻，一个凑大我哋三个，大个咗知道要揾钱真系唔容易，佢牺牲咗佢嘅人生去照顾我哋三个，亦都俾我任性，多谢妈咪。我会努力啲，之后佢可以住个好啲嘅屋，买间好啲嘅屋畀佢住，唔好担心，我会继续努力加油。”这十年的演员路难关重重，付出与收获不成正比，值得吗？她毫不犹豫说：“因为我视呢个系我梦想，我想做演员做到老，系值得㗎！”
场地提供：Mini hotel Causeway Bay
发型：Kathy Wong@Hair corner K11、Eunice Leung@Hair corner K11
点击睇更多专访靓相：