So Ching退团｜Winka回应“8-1=0”说法：我哋而家系归零

So Ching（苏芷晴）今午（10日）以“仍未能完全适应幕前工作”宣布正式退出COLLAR。出PO半小时后，COLLAR 7位成员沈贞巧（Gao）、王家晴（Candy）、许轶（Day）、苏雅琳（Ivy So）、邱彦筒（Marf）李芯駖（Sumling）以及陈泳伽（Winka）齐齐会见传媒。

记者会一开始，先系由经理人Wing交代So Ching退团，并表示会尊重对方嘅决定。之后队长Gao表示十分不舍So Ching，但眼见对方在过去的日子一直努力平衡各方面，包括重踏舞台生活，希望大家能够给予空间。“重新出发佢嘅生活，好好咁过佢平静自在嘅日子，而我哋亦都知道喺呢段时间，系好唔容易，所以我哋系会完全尊重So Ching嘅决定。”

Gao交代完之后，公关表示有十分钟传媒发问环节，记者问到底So Ching何时决定退团，Gao表示唔记得，并谓“系较早前决定”。她指大家将会带著So Ching的力量，以七人姿态继续走下去，亦唔会加入新成员。

有记者提到“8-1=0”呢个说法时，Winka表示COLLAR如今系归零:“呢句说话系我当时自己讲，咁由我解释返啦。其实当时8-1=0呢个说法系我自己个人俾一个力量So Ching，话俾So Ching听我哋之后嘅团歌或者之后嘅一啲新作品好想等埋佢返嚟先做。咁但系而家佢有呢个决定，我哋一定系要尊重同埋要接纳，咁8-1=0，我哋而家系归零，所以我哋重新出发，希望大家会继续支持我哋之后嘅作品，同埋我哋之后7个人都会试唔同嘅嘢，做唔同作品出嚟，希望大家会继续支持我哋？或者我哋都会更加努力去做好我哋嘅表现。”

对于So Ching退团，7位成员都有发表个人感受

Ivy So：“苏晴归队嘅时候好开心，但见到佢一直好努力咁去适应一个挑战，我觉得佢系好勇敢嘅女仔，亦希望佢生活开开心心，所以即使有唔舍得，我哋都非常尊重佢嘅决定，同埋即使换咗身分，COLLAR曾经经历过嘅嘢系唔会变。”

Candy：“知道呢个消息一定会唔开心同唔舍得，但相信在坐每一位最想见到So Ching过得开心幸福同自在，所以绝对尊重佢个决定。”

Marf：“对于So Ching嘅理解，同大家咁耐嘅相识，知道佢有呢个决定我已经系冇多问，纯粹要尊重同唔会加以评论佢。尊重同support佢之后嘅决定，唯一之后我哋会focus系，因为8个女仔都系好有梦想，好多嘢想挑战、想带畀大家好多嘢 ，所以COLLAR嚟紧以７个人姿态比更多能量大家睇，希望大家继续支持我哋。”

Gao：“一直以嚟都见到So Ching好勇敢咁企返出嚟去join in返我哋所有演出/作品，但系呢个过程见到佢真系唔容易，而我自己觉得佢做退团决定系更唔容易，所以我哋系会完全尊重佢决定，希望大家真系畀空间佢！”

芯駖：“So Ching有呢个决定，我哋系非常尊重，当然唔开心一定会有，由《造星VI》到而家都系八个人嘅一个团队，相信大家最希望都系So Ching身心健康，能够走到最舒服嘅路，做舒服嘅自己，呢个都系我哋嘅期望，嚟紧七个人好似So Ching所讲，希望继续有力量行落去。”

Winka：“第一下知道佢决定，我感觉反而系唔想佢因为咁而愧疚，因为我觉得每个人都有自己嘅权利去揾自己开心嘅生活，同埋我都好希望佢会幸福快乐，所以，在我角度，我会接纳同尊重佢呢个决定，佢都有讲希望我哋可以好好咁继续落去，所以希望佢之后会揾到快乐！”

Day：“成团到而家，之间嘅回忆都喺我哋心入面或者fans心入面都唔会消失，佢做呢个决定，我哋其实都系点都有啲感受，但大家都一齐祝福So Ching 亦祝福COLLAR未来发展。”