吴耀汉设灵｜洪金宝回忆与吴耀汉合作：我哋好少被佢整蛊

一代笑匠吴耀汉上月9日离世，其家人于今日（8日）在世界殡仪馆为他设灵，他生前好友洪金宝及岑建勋等人都有到灵堂致哀，洪金宝曾于电影《五福星》系列中与吴耀汉合作无间，他在接受《香港01》访问时表示怀念老友。

洪金宝被问到灵堂内播放《五福星》系列电影会否令他感到有回忆时，他说：“呢个梗系多回忆啦，睇到好多回忆，谂起吴耀汉，谂起我哋一齐𠮶阵时到而家都好多回忆，睇咗就更加更加个感受就大啲。段段都好多回忆，唔系净系边一段，但我参与落嚟，自己睇咗落嚟，原来我哋合作咗好多年，好多好多部戏，有好多好多开心嘅时刻。亦有好多好多嘅笑声，我哋拍戏𠮶阵时好开心㗎，冇任何政治背景嘅压力，乜都冇，好开心㗎。”洪金宝又提到与吴耀汉合作无间非常开心，有很多珍贵的回忆。

另外洪金宝被问到有否被好友吴耀汉“整蛊”时，他则说：“我哋好少被佢整蛊，我整蛊人就有，我整蛊都系笑嘅嘢嚟，唔会话整到对方心痛啊、肉痛啊、骨痛啊，只系视觉上同啲嘢好好笑。因为大家都知道有时开玩笑要知道对方系一个咩人，如果系成龙就可以笃入啲，流少少血都唔怕。”