吴耀汉逝世｜曾志伟忆受教去做编剧　关系亦师亦友：对我影响好深

著名演员吴耀汉今日（10/04）逝世，享年83岁。与他相识多年的曾志伟为节目录影时接受《香港01》访问。他坦言与吴耀汉多年好友，关系亦师亦友，也是由他提议之下才由龙虎武师转型成为编剧、演员，直言对他演艺生涯影响深远。

曾志伟：“76年𠮶时，佢同麦嘉一齐返嚟做《一支光棍走天涯》嘅时候，我仲系龙虎武师。我拍佢一部戏嘅时候，就系佢同我讲话：‘武侠片唔流行嘅话，你做武师冇用架㖞，你咁钟意度桥不如去做编剧啦。’咁我由𠮶时开始我就走咗去做编剧，所以佢影响我演艺生涯好大。”

谈到吴耀汉，志伟哥就形容他为“冷面笑匠”。他说：“可能佢系喺英国演戏，所以演技同我哋好唔同，佢嘅演技系一种冇表情嘅做法，唔同我哋70，80年代好夸张嘅表情，所以喺佢身上都学到好多嘢。佢嘅喜剧节奏系非常之好，我同佢拍最多就系福星系列，由《福星高照》到最后《最佳福星》等等，我哋5个人嘅友情系好好。Richard系一个好幽默成日都好钟意讲笑嘅人，佢系一个绅士，因为佢太太系外国人，佢又系英国返嚟，所以佢好多幽默都系来自英国。你睇佢度嘅桥好多都系用身体语言，好少用对白，所以佢对香港喜剧演戏嘅影响系好深。”

志伟哥续说：“佢带动到香港好多喜剧嘅范畴，80年代咁多喜剧，佢都拍过好多，亦占咗好大功劳。”志伟表示，最后一次与吴耀汉合作是2017年的《僵尸清道夫》，他说：“𠮶时佢仲系好幽默，喺现场讲好多旧时嘅嘢，仲系好健康，但系疫情呢几年就见唔到佢。喺报纸见到佢身体唔系好好，今朝睇新闻就见到佢⋯我都好难过。喺福星入面佢同我都系好好朋友，对我影响好深，我好珍惜呢个朋友，亦都好多谢佢对演艺界嘅贡献。”问到有没有追思活动，志伟哥说：“Richard系一个好有交带嘅人，佢屋企人会帮佢安排。如果有任何嘢要我哋我哋呢啲老朋友做，我哋一定义不容辞。”